बातमी ऐका (Marathi Voice Reader)
एआय इमेज अक्कलकोट तालुक्यातील जेऊर येथे एका सराफास लुटून १० लाखांचे दागिने लंपास केले होते. त्या गुन्ह्याचा छडा लावण्यासाठी अटक केलेल्या संशयित आरोपीकडून मिळालेल्या माहितीनुसार आम्ही गुरुवारी पाथर्डी येथील खरबंडी गावात त्याच्या वस्तीपर्यंत गेलो होतो. रात्री १०.३७ वाजता आरोपीच्या जवळ गेलो. तो पाईपलाईनसाठी चर खोदत असल्याचे दिसून आले. तो गाफील असेल त्यास आम्ही ताब्यात घेऊ असे म्हणून ५ पोलिसांच्या मदतीने त्याच्याजवळ गेलो. त्याने पाहताच प्रश्न केला, ‘कोण तुम्ही?’ आमचे उत्तर ‘पोलिस.’ क्षणाचाही विलंब न करता त्याने पोलिसांच्या दिशेने गोळीबार सुरू केला. आम्ही इतर संशयिताना ताब्यात घेण्याचा प्रयत्न करत असतानाच गोळीबार करत पावस कचरु गायकवाड पळून गेला. त्यास शोधण्याचा प्रयत्न केला. पण तो बीडच्या दिशेने पळून गेला. आम्ही धैर्य सोडले नाही, त्याचा शोध घेत आहोत असे आपबीती सहायक पोलिस निरीक्षक विजय शिंदे सांगत होते. या प्रकरणात एकाला सोलापुरात अटक केली. त्याच्या सांगण्यावरुन मुख्य आरोपी पाथर्डीत आहे, असे समजले. त्यानुसार पावस गायकवाड याला ताब्यात घेण्यासाठी मोहीम आखली होती. पोलिस येत असल्याचे कळू नये म्हणून रात्रीची वेळ निवडली. स्थानिक पोलिसांच्या मदतीने त्याच्याजवळ पोहोचलो. पण, ‘पोलिस’ शब्द कानी पडताच त्याने थेट गोळीबार सुरू केला होता. तेथील पोलिस आसाराम बाटुळे यांच्या कानाच्या बाजूने गोळी चाटून गेली. त्यानंतर तो पळून गेला. पळणाऱ्या इतरांना पकडण्यासाठी धावलो. पण कारमधून सर्व जण बीडच्या दिशेने पळून गेले. पिस्तूल चोरीचा असू शकतो पावसने ज्या पिस्तूलमधून गोळी झाडली, ती गोळी पाहता पिस्तूल गावठी कट्टा नाही. त्याच्याकडे कोणत्याही प्रकारचा शस्त्र परवाना नाही. त्यामुळे पिस्तूल चोरीचा असू शकतो. लोडेड पिस्तूल असल्याने तो सराईत गुन्हेगार होता, हे नक्की.
