बातमी ऐका (Marathi Voice Reader)
राज्यातील महानगरपालिका निवडणुकांच्या पार्श्वभूमीवर महायुतीमधील अंतर्गत विसंवाद आणि उमेदवारीवरून निर्माण झालेला रणकंदन अवघ्या महाराष्ट्राने अनुभवला. युती होईल की नाही, कोणाला तिकीट मिळेल, एबी फॉर्म कधी मिळणार, या प्रश्नांवरून शेवटच्या क्षणापर्यंत उमेदवारांना ताटकळत ठेवण्यात आले. परिणामी अनेक ठिकाणी संताप, नाराजी आणि भावनिक उद्रेक पाहायला मिळाला. काही ठिकाणी उमेदवारांनी छाती बडवून निषेध केला, काहींच्या डोळ्यांत अश्रू तरळले, तर काहींनी एबी फॉर्म घेऊन जाणाऱ्या वाहनांचा पाठलाग केल्याचे दृश्यही समोर आले. या सगळ्या गोंधळात आता मुंबईत घडलेला एक प्रकार मात्र सर्वांनाच हादरवणारा ठरला आहे. मुंबई महापालिकेतील प्रभाग क्रमांक 173 मध्ये भाजपच्या एका इच्छुक उमेदवाराने उमेदवारी मिळवण्यासाठी अक्षरशः टोक गाठल्याचे उघड झाले आहे. शिल्पा केळुसकर या उमेदवाराला अधिकृत उमेदवारी न मिळाल्याने त्यांनी थेट बनावट एबी फॉर्मचा आधार घेत निवडणूक आयोगाकडे उमेदवारी अर्ज सादर केल्याचा धक्कादायक प्रकार समोर आला आहे. विशेष म्हणजे हा एबी फॉर्म मूळ नसून त्याची कलर झेरॉक्स प्रत असल्याचे उघड झाले आहे. तरीही हा अर्ज छाननीदरम्यान वैध ठरवण्यात आल्याने निवडणूक व्यवस्थेवरच गंभीर प्रश्न उपस्थित झाले आहेत. या प्रकरणामुळे भाजपमध्ये मोठी खळबळ उडाली आहे. कारण प्रभाग क्रमांक 173 ची जागा युतीतील वाटपानुसार शिवसेना शिंदे गटाला मिळाली आहे. त्यामुळे या प्रभागातून शिंदे गटाकडून माजी नगरसेवक रामदास कांबळे यांच्या पत्नी पूजा कांबळे या अधिकृत उमेदवार म्हणून निवडणुकीच्या मैदानात आहेत. अशा परिस्थितीत भाजपच्या शिल्पा केळुसकर यांनी सादर केलेला बनावट एबी फॉर्म आणि त्यावर वैध ठरलेला अर्ज, यामुळे युतीतील समन्वयावरही प्रश्नचिन्ह निर्माण झाले आहे. दरम्यान, हा प्रकार लक्षात येताच भाजपकडून तातडीने हालचाली सुरू करण्यात आल्या. मुंबई भाजप अध्यक्ष अमित साटम यांच्या निदर्शनास ही बाब आल्यानंतर त्यांनी थेट निवडणूक आयोगाकडे तक्रार दाखल केली. महापालिका निवडणूक आयोगाला पाठवलेल्या पत्रात शिल्पा केळुसकर यांचा उमेदवारी अर्ज तत्काळ रद्द करण्यात यावा, अशी ठाम मागणी करण्यात आली आहे. अधिकृत एबी फॉर्म नसताना, बनावट कागदपत्रांच्या आधारे अर्ज वैध ठरणे हे गंभीर स्वरूपाचे उल्लंघन असल्याचा दावा भाजपने केला आहे. या संपूर्ण प्रकरणामागची पार्श्वभूमी आणखी धक्कादायक आहे. माहितीप्रमाणे, शिल्पा केळुसकर यांना भाजपकडून सुरुवातीला अधिकृत एबी फॉर्म देण्यात आला होता. मात्र नंतर जागावाटपात बदल झाल्यानंतर पक्षाने तो एबी फॉर्म परत घेतला. त्यानंतरही उमेदवारीच्या आशेवर शिल्पा केळुसकर यांनी डुप्लिकेट एबी फॉर्म तयार केला आणि तोच अर्जासोबत जोडून निवडणूक आयोगाकडे सादर केल्याचे समोर आले आहे. हा प्रकार उघडकीस येताच भाजपमध्ये अस्वस्थता वाढली असून पक्षाची मोठी नामुष्की झाल्याचे बोलले जात आहे. दरम्यान, या प्रकरणाला आणखी गूढ वळण मिळाले आहे. शिल्पा केळुसकर यांचा अर्ज वैध ठरल्यानंतर त्यांचे पती दत्ता केळुसकर हे अचानक नॉट रिचेबल झाल्याची माहिती समोर आली आहे. त्यामुळे या प्रकरणातील जबाबदारी, निर्णय आणि पुढील भूमिका याबाबत संभ्रम निर्माण झाला आहे. दुसरीकडे, भाजपकडून शिल्पा केळुसकर यांनी स्वेच्छेने उमेदवारी अर्ज मागे घ्यावा, यासाठी प्रयत्न सुरू असल्याची माहिती भाजपच्या वरिष्ठ नेत्यांनी दिली आहे. महायुतीतील उमेदवारी गोंधळ, एबी फॉर्मवरून झालेली धक्कादायक प्रकरणे आणि आता थेट बनावट कागदपत्रांचा वापर, या सगळ्यांमुळे महापालिका निवडणुकांची विश्वासार्हताच धोक्यात आल्याचे चित्र आहे. मुंबईतील प्रभाग क्रमांक 173 मधील हा प्रकार केवळ एका उमेदवारापुरता मर्यादित न राहता, संपूर्ण निवडणूक प्रक्रियेतील त्रुटी आणि राजकीय पक्षांच्या अंतर्गत विस्कळीतपणाचे प्रतीक ठरत आहे. निवडणूक आयोग यावर काय निर्णय घेतो आणि संबंधित उमेदवारावर कोणती कारवाई होते, याकडे आता सर्वांचे लक्ष लागले आहे.
