बातमी ऐका (Marathi Voice Reader)
काँग्रेस आमदार नाना पटोले यांनी स्टॅम्प ड्युटी घोटाळ्याप्रकरणी केलेले आरोप भाजप आमदार नरेंद्र मेहता यांनी जोरकसपणे फेटाळून लावले आहेत. माझ्यावरील स्टॅम्प ड्युटी घोटाळ्याचे आरोप पूर्णतः निराधार आहेत. राजकीय शत्रूंनी दिलेल्या सुपारीवरून माझ्यावर ही चिखलफेक केली जात आहे, असे ते म्हणालेत. महसूल विभागाच्या एका पत्रात भाजप आमदार नरेंद्र मेहता यांचा उल्लेख चक्क भूमाफिया असा करण्यात आल्याचा खळबळजनक दावा काँग्रेस आमदार नाना पटोले यांनी केला आहे. या प्रकरणी त्यांनी नरेंद्र मेहता यांच्यावर टीकेची झोड उठवली आहे. महसूल वनिभागाने 20 जून 2025 च्या आपल्या पत्रात सेव्हन इलेव्हन कन्स्ट्रक्शनचे मालक नरेंद्र लालचंद मेहता यांनी मुद्रांक शुल्क व दंड थकवल्याचा उल्लेख आहे. या पत्रात मेहता यांचा उल्लेख स्पष्टपणे भूमाफिया असा करण्यात आला आहे. या पत्रावर महसूलमंत्री चंद्रशेखर बावनकुळे यांची स्वाक्षरी आहे. त्यामुळे आता त्यांनी मेहतांवर कारवाई करून दाखवावी, असे पटोले यांनी म्हटले आहे. माझ्यावरील सर्व आरोप बिनबुडाचे नाना पटोले यांच्या या आरोपांना नरेंद्र मेहता यांनी जोरदार प्रत्युत्तर दिले. ते विधिमंडळ परिसरात पत्रकारांशी बोलताना म्हणाले, माझ्यावरील सर्व आरोप बिनबुडाचे आहेत. आमचे सर्व व्यवहार अत्यंत पारदर्शक आहेत. राजकीय शत्रूंनी दिलेल्या सुपारीवरून ही चिखलफेक करण्यात येत आहे. नाना पटोले यांनी ज्या योजनेचा उल्लेख केला, ती योजना महाविकास आघाडी सरकारच्या काळात विशेषतः पटोले सभापती असतानाच आणली गेली. या योजनेत काही त्रुटी असतील तर मविआ सरकारने बिल्डरांना खूश करण्यासाठी ही योजना आणली होती का? याचा खुलासा नाना पटोले यांनी करावा. माझ्या नावावर आमदार होण्यापूर्वी केवळ एकच जागा होती. तिची सर्व कायदेशीर प्रक्रिया पूर्ण झाली आहे. आमची कोणतीही स्टॅम्प ड्युटी थकलेली नाही. आमच्याकडे 4-5 लोक असे आहेत जे केवळ ब्लॅकमेलर व चीटर आहेत. त्यांच्यावर अनेक गुन्हे दाखल आहेत. हे पेड वर्कर मुख्यमंत्री व उपमुख्यमंत्र्यांकडे सतत खोट्या तक्रारी करत असतात. पण त्यात कोणतेही तथ्य नसते. राजकीय द्वेषापोटी आरोप नरेंद्र मेहता पुढे म्हणाले, आम्ही मीरा भाईंदरमध्ये काँग्रेसचे अस्तित्व संपवले. याचा राग मनात धरून हे स्थानिक नेते नाना पटोले यांना चुकीची माहिती पुरवत आहेत. माझ्यावर 5-6 महिन्यांपूर्वीच्या एका जुन्या पत्राचा आधार घेऊन केवळ राजकीय द्वेषापोटी आरोप केले जात आहेत. उल्लेखनीय बाब म्हणजे नरेंद्र मेहता यांनी यावेळी रुग्णालयात उंदीर चावल्यामुळे महिलेच्या झालेल्या मृत्यूवर तीव्र संताप व्यक्त् केला. ही अत्यंत गंभीर घटना असून, संबंधितांवर कडक कारवाई झाली पाहिजे, असे ते म्हणाले.
