बातमी ऐका (Marathi Voice Reader)
पुणे लाचलुचपत प्रतिबंधक विभागाने पिंपरी-चिंचवड महानगरपालिकेच्या ‘ड’ प्रभाग क्षेत्रीय कार्यालयातील बीट निरीक्षकाला 70 हजार रुपयांची लाच घेताना रंगेहाथ अटक केली आहे. अनधिकृत बांधकामावर कारवाई न करण्यासाठी त्याने ही लाच मागितली होती. उमेश अरुण लोंढे (वय 28, रा. रहाटणी, पुणे) असे अटक करण्यात आलेल्या स्थापत्य अभियांत्रिकी सहाय्यक (वर्ग-3) अधिकाऱ्याचे नाव आहे. या प्रकरणात 58 वर्षीय तक्रारदाराने पिंपळे गुरव येथे तीन मजली इमारत बांधली होती. या बांधकामाला महानगरपालिकेची रीतसर परवानगी नव्हती. त्यामुळे पिंपरी-चिंचवड महानगरपालिकेने 25 फेब्रुवारी 2026 रोजी त्यांना अनधिकृत बांधकामाची नोटीस बजावली होती. या नोटिसीविरोधात तक्रारदारांनी मुंबई उच्च न्यायालयात याचिका दाखल केली होती. उच्च न्यायालयाने तक्रारदारांना नियमानुसार दंड भरून बांधकाम नियमित करण्याचे आदेश दिले होते. त्यानुसार, तक्रारदारांनी महापालिकेकडे बांधकाम नियमितीकरणासाठी अर्ज केला होता. याच दरम्यान, अतिक्रमण विरोधी विभागाचे बीट निरीक्षक उमेश लोंढे यांनी तक्रारदारांशी संपर्क साधला. उच्च न्यायालयाच्या आदेशाची प्रत दाखवूनही लोंढे यांनी त्याकडे दुर्लक्ष केले. त्यांनी तक्रारदाराला सांगितले की, “तुमचे बांधकाम पाडावे लागेल. कारवाई टाळायची असेल तर 70 हजार रुपयांची लाच द्यावी लागेल.” तक्रारदाराला लाच देण्याची इच्छा नसल्याने त्यांनी पुणे लाचलुचपत प्रतिबंधक विभागाकडे (एसीबी) तक्रार नोंदवली. एसीबीच्या पथकाने पडताळणी केली असता, उमेश लोंढे यांनी पंच समक्ष 70 हजार रुपयांची लाच मागितल्याचे निष्पन्न झाले. यानंतर पिंपरी-चिंचवड महानगरपालिकेच्या ‘ड’ प्रभाग क्षेत्रीय कार्यालयाच्या पार्किंगमध्ये सापळा रचण्यात आला. उमेश लोंढे यांनी तक्रारदाराकडून 70 हजार रुपयांची लाच स्वीकारताच, एसीबीच्या पथकाने त्यांना रंगेहाथ पकडले. याप्रकरणी वाकड पोलिस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला आहे. ही कारवाई पोलिस अधीक्षक शिरीष सरदेशपांडे, अप्पर पोलिस अधीक्षक अजित पाटील, अप्पर पोलिस अधीक्षक अर्जुन भोसले आणि सहायक पोलिस आयुक्त दयानंद गावडे यांच्या मार्गदर्शनाखाली सहाय्यक पोलिस आयुक्त सतीश वाळके आणि पोलिस निरीक्षक प्रवीण निंबाळकर यांनी यशस्वीरित्या पार पाडली.
