बातमी ऐका (Marathi Voice Reader)
हिंगोली जिल्ह्यातील एका विवाहित महिलेला धमकी देऊन अत्याचार केला अन अश्लील व्हिडिओ काढून बदनामीची धमकी देणाऱ्या एका तरुणासह दोघांवर हिंगोली शहर पोलिस ठाण्यात सोमवारी ता. 15 रात्री उशीरा गुन्हा दाखल झाला आहे. सदर प्रकरणाचे गांभीर्य लक्षात घेऊन पोलिसांनी तपास कामाला गती दिली असून दोन्ही आरोपींचा शोध सुरु करण्यात आला आहे. पोलिसांनी दिलेल्या माहितीनुसार, हिंगोली शहरातील बावनखोली भागातील अमनखान या तरुणाने जिल्हयातील एका महिलेस प्रेमाच्या जाळ्यात ओढले. त्यानंतर तिच्या इच्छे विरुध्द अत्याचार केला यावेळी तिला धमकीही दिली. मात्र भिती पोटी तिनेने सदर प्रकार कोणालाही सांगितला नाही. त्यानंतर अमनखान याने वेळेवेळी तिला धमकी देऊन शारिरीक संबंध ठेवले. दरम्यान, सदर महिला तिच्या लहान बहिणीच्या लग्नासाठी हिंगोली शहरात आली असतांना अमनखान याने बळजबरीने तिच्या घरात प्रवेश करून तिचा विनयभंग केला. यावेळी त्याच्या सोबत असलेल्या त्याचा मित्र सलमानखान याने महिलेचे अश्लील व्हिडिओ काढून बदनामी करण्याची धमकी दिली. मागील तीन वर्षापासून त्यांचा अत्याचार सहन करणाऱ्या महिलेने अखेर त्यांच्या धमक्यांना भिक न घालता सोमवारी ता. 15 रात्री थेट हिंगोली शहर पोलिस ठाणे गाठून तक्रार दाखल केली. यावरून हिंगोली शहर पोलिसांनी अमनखान व सलमान खान यांच्या विरुध्द गुन्हा दाखल केला आहे. घटनेचे गांभीर्य लक्षात घेऊन पोलिस उपाधिक्षक कुंदनकुमार वाघमारे, पोलिस निरीक्षक देवेंद्रसिंह ठाकूर, सहाय्यक पोलिस निरीक्षक आनंद बनसोडे, उपनिरीक्षक युवराज वाघमारे यांच्या पथकाने तातडीने घटनास्थळी भेट देऊन पाहणी केली आहे. पोलिसांनी आरोपींचा शोध सुरु केला आहे. प्रकरणात वरिष्ठ पोलिसांनी लक्ष घालून तपासाची माहिती घेतली आहे. सहाय्यक पोलिस निरीक्षक आनंद बनसोडे पुढील तपास करीत आहेत.
