सुरेश पाचभाई | मारेगाव
मारेगाव पोलीस ठाण्याच्या नेतृत्वात महत्त्वपूर्ण बदल करण्यात आला असून सहाय्यक पोलीस निरीक्षक सागर दानडे यांनी नवे ठाणेदार म्हणून पदभार स्वीकारला आहे. विद्यमान पोलीस निरीक्षक श्याम वानखेडे यांची प्रशासकीय कारणास्तव बदली करण्यात आली आहे.
या बदलामुळे तालुक्यातील पोलीस प्रशासनाच्या कार्यपद्धतीकडे सर्वांचे लक्ष वेधले गेले आहे.पदभार स्वीकारल्यानंतर सागर दानडे यांनी कायदा व सुव्यवस्था अधिक सक्षम करण्यासोबतच गुन्हेगारी प्रवृत्तींवर कठोर नियंत्रण ठेवण्याचा निर्धार व्यक्त केला. नागरिकांच्या तक्रारींना तातडीने प्रतिसाद, अवैध धंद्यांविरोधात प्रभावी कारवाई आणि सर्वसामान्यांना न्याय मिळवून देणे हे आपल्या कार्याचे प्रमुख उद्दिष्ट राहील, असे त्यांनी स्पष्ट केले.
दरम्यान, श्याम वानखेडे यांनी आपल्या कार्यकाळात विविध गंभीर गुन्ह्यांच्या तपासात उल्लेखनीय कामगिरी बजावत कायदा-सुव्यवस्था अबाधित राखण्यासाठी मोलाचे योगदान दिले. सामाजिक उपक्रमांच्या माध्यमातून पोलीस प्रशासन आणि नागरिक यांच्यातील विश्वास अधिक दृढ करण्याचे कार्यही त्यांनी केले.
मारेगाव पोलीस ठाण्याच्या नेतृत्वात झालेल्या या बदलामुळे पोलीस प्रशासनात नव्या पर्वाची सुरुवात झाल्याची भावना व्यक्त होत आहे. व्यापारी, सामाजिक संघटना, नागरिक तसेच राजकीय वर्तुळाकडून नव्या ठाणेदारांकडून पारदर्शक, जनाभिमुख आणि परिणामकारक पोलीसिंगच्या अपेक्षा व्यक्त केल्या जात आहेत.
“नवे नेतृत्व, नवी दिशा आणि गुन्हेगारीविरोधात कठोर भूमिका” या अपेक्षांसह सागर दानडे यांच्या कार्यकाळाकडे संपूर्ण तालुक्याचे लक्ष लागले असून या प्रशासकीय निर्णयामुळे पोलीस यंत्रणेला नवचैतन्य मिळण्याची शक्यता व्यक्त केली जात आहे.
