जळका शिवारातील खळबळजनक प्रकरणाचा उलगडा; मृतक राहुल जोशी असल्याची पोलिसांची पुष्टी
सुरेश पाचभाई मारेगाव
मारेगाव तालुक्यातील जळका शिवारात रोडलगत असलेल्या नालीमध्ये आढळलेल्या अज्ञात पुरुषाच्या मृतदेहाची ओळख अवघ्या दोन तासांत पटल्याने या प्रकरणाला वेगळीच कलाटणी मिळाली आहे. ‘विदर्भ एस.पी. न्यूज नेटवर्क’ने मृतदेहाबाबतचे वृत्त प्रसिद्ध केल्यानंतर संबंधित माहिती मृतकाच्या नातेवाईकापर्यंत पोहोचली आणि मृतकाची ओळख निश्चित करण्यात पोलिसांना यश आले.
पोलिसांनी दिलेल्या माहितीनुसार, मृत व्यक्तीचे नाव राहुल हरिश्चंद्र जोशी (वय ४६) असून ते हनुमान मंदिराजवळ, जोशी लेआउट, पांढरकवडा, ता. केळापूर, जि. यवतमाळ येथील रहिवासी होते.मंगळवारी (दि. १६) दुपारी सुमारे १२.३० वाजताच्या सुमारास जळका शिवारातील साईनाथ परचाके यांच्या शेताजवळील नालीमध्ये एका अनोळखी पुरुषाचा मृतदेह आढळून आला होता.
घटनेची माहिती मिळताच मारेगाव पोलिसांनी घटनास्थळी धाव घेत पंचनामा केला. त्यानंतर मृतदेह उत्तरीय तपासणीसाठी ग्रामीण रुग्णालय, मारेगाव येथे पाठविण्यात आला.प्राथमिक माहितीनुसार मृत व्यक्तीचे वय अंदाजे ४५ ते ५० वर्षे, उंची सुमारे ५ फूट ८ इंच, रंग गोरा, शरीरयष्टी सडपातळ, काळे-पांढरे केस व वाढलेली दाढी अशी ओळख सांगण्यात आली होती. त्यांच्या अंगावर फिकट गुलाबी रंगाचा हाफ टी-शर्ट व राखाडी रंगाची हाफ पँट होती.
या घटनेची माहिती जळका येथील पोलीस पाटील विजय मोघे यांनी मारेगाव पोलिसांना दिली होती. अज्ञात मृतदेहाची ओळख पटविण्यासाठी पोलिसांनी नागरिकांचे सहकार्य मागितले होते. त्यानंतर अल्पावधीतच मृतकाची ओळख पटल्याने तपासाला महत्त्वाची दिशा मिळाली आहे.
दरम्यान, राहुल जोशी यांच्या मृत्यूमागील नेमके कारण अद्याप स्पष्ट झाले नसून उत्तरीय तपासणी अहवाल व पोलिस तपासानंतरच वस्तुस्थिती समोर येणार आहे. त्यामुळे मृत्यूचे कारण अथवा स्वरूपाबाबत कोणताही निष्कर्ष काढणे अद्याप लवकर असल्याचे पोलिस सूत्रांनी सांगितले.
या प्रकरणाचा पुढील तपास ठाणेदार सागर दानडे, सहाय्यक पोलीस निरीक्षक रवी बुरकुले, सहाय्यक पोलीस उपनिरीक्षक दिगंबर किनाके तसेच पोलीस कर्मचारी नामदेव भटारकर, सागर दीपेवार आणि विकास खंडारे करीत आहेत.