बातमी ऐका (Marathi Voice Reader)
श्रीगोंदेत एका 17 वर्षीय अल्पवयीन मुलीची तिच्याच 24 वर्षीय प्रियकराने चारित्र्याच्या संशयावरून निर्घृण हत्या केली. इतकेच नव्हे, तर या गुन्ह्याचा पुरावा नष्ट करण्यासाठी आरोपीने आपल्या बापाच्या मदतीने तिचा मृतदेह जंगलात नेऊन पेट्रोल टाकून जाळला. या प्रकरणी श्रीगोंदे पोलिसांनी मुख्य आरोपी शुभम सुखदेव ओहळ आणि त्याला मृतदेहाची विल्हेवाट लावण्यास मदत करणारे त्याचे वडील सुखदेव ओहळ या दोघांनाही अटक केली असून एकूण 3 संशयितांवर खुनाचा आणि ॲट्रॉसिटी कायद्यांतर्गत गुन्हा दाखल करण्यात आला आहे. गेल्या काही महिन्यांपासून तिचे शुभमसोबत प्रेमसंबंध होते आणि दोघेही विवाह न करता एकत्र राहत होते. मात्र, शुभम तिच्यावर सतत संशय घेत असल्याने त्यांच्यात वारंवार वाद होत होते. घटनेच्या रात्री याच कारणावरून झालेल्या भांडणात रागाच्या भरात तरुणाने लोखंडी रॉड आणि फरशीच्या तुकड्याने तिच्या डोक्यावर प्रहार केला, ज्यामुळे ती जागीच ठार झाली. आरोपींच्या हालचालींवर पाळत ठेवत केली अटक पोलिस निरीक्षक संजय ठेंगे यांनी सहकाऱ्यांसह तातडीने घटनास्थळी धाव घेतली. कोतवाली पोलिसांकडून मिळालेल्या गोपनीय माहितीच्या आधारे श्रीगोंदे पोलिसांनी रात्रीतूनच वेगाने सूत्रे फिरवली. संशयास्पद हालचालींवर पाळत ठेवून मुख्य आरोपी आणि त्याच्या वडिलांना घरातूनच बेड्या ठोकल्या. पोलिसांच्या सतर्कतेमुळे गुन्हा काही तासांतच उघडकीस आला. दोन दिवस मुलीचा मृतदेह गादीत लपवला हत्येनंतर घाबरलेल्या आरोपीने अल्पवयीन मुलीचा मृतदेह गादीत गुंडाळला आणि घरातच लपवून ठेवला. त्यानंतर तो कुलूप लावून नगरला पळून गेला. दुसऱ्या दिवशी वडिलांना सोबत घेऊन परत आला. नंतर दोघांनी मध्यरात्रीपर्यंत योग्य संधीची वाट पाहिली आणि तिसऱ्या दिवशी मृतदेह जंगलात नेऊन पेटवला. तोपर्यंत मुलीचा मृतदेह गादीतच गुंडाळलेला होता. फोन कॉलने उघड केला गुन्हा हत्येनंतर घाबरलेल्या मुख्य आरोपीने अहिल्यानगरातील आपल्या एका मित्राला फोन करून ‘मी माझ्या बायकोला मारून टाकले’ असे सांगितले. आपण पोलिसांच्या कचाट्यात सापडू या भीतीने त्या मित्राने तातडीने कोतवाली पोलिसांना ही माहिती दिली. कोतवाली पोलिसांनी श्रीगोंदे पोलिसांना सतर्क करताच अवघ्या काही तासांत हा थरार उघडकीस आला.
