बातमी ऐका (Marathi Voice Reader)
राज्यातील सर्वसामान्य आणि प्रामुख्याने झोपडपट्ट्या व गरीब वस्त्यांमध्ये राहणाऱ्या नागरिकांना दर्जेदार आणि मोफत आरोग्य सेवा पुरवण्यासाठी राज्य सरकारने आज एक अत्यंत महत्त्वपूर्ण पाऊल उचलले आहे. “हिंदुहृदयसम्राट बाळासाहेब ठाकरे आपला दवाखाना’या महत्त्वाकांक्षी योजनेअंतर्गत औषध खरेदीसाठी तब्बल ४८ कोटी ५७ लाख रुपयांच्या निधीला प्रशासकीय मान्यता देण्यात आली आहे. या निधीतून तब्बल १०५ प्रकारच्या जीवनावश्यक औषधांची खरेदी केली जाणार असून, ती रुग्णांना पूर्णपणे मोफत दिली जाणार आहेत. सार्वजनिक आरोग्य विभागाने बुधवारी (१७ जून) या संदर्भातील अधिकृत शासन निर्णय जारी केला आहे. मुंबई महानगरपालिकेच्या धर्तीवर संपूर्ण महाराष्ट्रातील विविध शहरांमध्ये ही योजना राबवली जात आहे. मंत्रिमंडळाच्या बैठकीत संपूर्ण राज्यात एकूण ७०० ठिकाणी “आपला दवाखाना’ सुरू करण्याचा निर्णय घेण्यात आला होता. त्यापैकी सध्याच्या घडीला तब्बल ४७५ केंद्रे यशस्वीरीत्या कार्यरत आहेत. आर्थिक वर्ष २०२६-२७ च्या अर्थसंकल्पात या योजनेसाठी एकूण १०० कोटी रुपयांची भरीव तरतूद करण्यात आली आहे. या मंजूर निधीमधून पहिल्या टप्प्यात ४८.५७ कोटी रुपये औषध खरेदीसाठी वर्ग करण्यात आले आहेत. पारदर्शकता राखण्यासाठी ही सर्व खरेदी महाराष्ट्र वैद्यकीय वस्तू खरेदी प्राधिकरण अधिनियम, २०२३ नुसार थेट प्राधिकरणाकडून केली जाणार आहे. कोणत्याही विशिष्ट कंपनीला नफा होणार नाही, याची काळजी घेत तांत्रिक समितीच्या निकषांनुसारच जेम पोर्टलद्वारे औषधांची खरेदी करण्याचे कडक निर्देश शासनाने दिले आहेत. आर्थिक भार पूर्णपणे हलका होणार या निर्णयामुळे राज्यातील लाखो गोरगरीब रुग्णांना मोठा दिलासा मिळाला असून, औषधांवरील त्यांचा आर्थिक भार पूर्णपणे हलका होणार आहे. वस्त्यांमध्ये राहणाऱ्या नागरिकांना आता गंभीर आजारांवर लागणारी आणि दैनंदिन उपचारांची औषधे हक्काच्या ठिकाणी मोफत उपलब्ध होणार आहेत.
