राज्यातील आयएएस अधिकाऱ्यांच्या बदल्या या सातत्याने होत आहेत. आता मुख्यमंत्री देवेंद्र फडणवीस यांच्या शहराच्या अर्थात नागपूर महापालिकेच्या आयुक्तांची बदली करण्यात आली आहे. नागपूरच्या आयुक्त पदावरून डॉ. अभिजीत चौधरी यांची बदली करण्यात आली असून त्यांना आता पुणे महानगर विकास प्राधिकारणावर पाठवण्यात आले आहे. तसेच पुणे महानगर प्रदेश विकास प्राधिकारणाचे आयुक्त योगेश म्हसे यांची बदली करत त्यांना मंत्रालयातील अल्पसंख्यांक विकास विभागाच्या सचिवपदी त्यांची नियुक्ती करण्यात आली आहे. योगेश म्हसे हे 2009 च्या बॅचचे आयएएस ऑफिसर आहेत. अजित पवारांच्या निधनाच्या दिवशी राज्यातील 75 शाळांना अल्पसंख्यांक दर्जा देण्यात आला होता. या प्रकरणी तीव्र संताप व्यक्त केला गेला आणि मुख्यमंत्र्यांनी कारवाईचे आदेश दिले होते. आता योगेश म्हसे यांची बदली अल्पसंख्यांक विकास विभागात करण्यात आल्याने चर्चा सुरू झाली आहे. दरम्यान, 2011 च्या बॅचचे आयएएस अधिकारी डॉ. अभिजीत चौधरी यांची नागपूर महानगरपालिका आयुक्त पदावरून पुणे महानगर प्रदेश विकास प्राधिकरणाच्या आयुक्तपदी बदली करण्यात आली आहे. तातडीने लागू करण्यात आलेल्या या आदेशानुसार, चौधरी हे योगेश म्हसे यांच्याकडून पदभार स्वीकारतील, तर म्हसे यांची नियुक्ती मंत्रालयातील अल्पसंख्याक विभागाच्या सचिवपदी करण्यात आली आहे. दरम्यान, नागपूर महापालिकेच्या आयुक्तपदी अद्याप कोणाचीही नियुक्ती करण्यात आली नसून, या रिक्त पदावर आता कोणाची वर्णी लागणार, याकडे राजकीय आणि प्रशासकीय वर्तुळाचे लक्ष लागले आहे.
राज्यातील दोन आयएएस अधिकाऱ्यांची बदली:नागपूरचे आयुक्त डॉ. अभिजीत चौधरींची पुण्याला रवानगी; योगेश म्हसे आता मंत्रालयात सचिव
Ad Banner
Show Comments (0)
Hide Comments (0)
Subscribe
Login
0 Comments
Oldest
