मारेगाव पोलिसांची धडाकेबाज कारवाई; दोघांविरुद्ध गुन्हा दाखल
प्रमोद रा. मेश्राम, मारेगाव तालुका प्रतिनिधी
मारेगाव पोलिसांनी अंबेझरी शिवारात धाडसी कारवाई करत कथितरीत्या अवैधरीत्या वाहतूक करण्यात येत असलेली गोवंश जनावरे ताब्यात घेतली. या कारवाईत एका गायीचा मृत्यू झाल्याचे आढळून आले असून जिवंत जनावरे व वाहनासह सुमारे ३ लाख ५०० रुपयांचा मुद्देमाल जप्त करण्यात आला आहे.
याप्रकरणी दोन जणांविरुद्ध विविध कायद्यांअंतर्गत गुन्हा दाखल करण्यात आला असून पुढील तपास सुरू आहे.पोलिसांनी दिलेल्या माहितीनुसार, डायल 112 वर प्राप्त झालेल्या माहितीच्या आधारे मारेगाव पोलिसांचे पथक अंबेझरी शिवारात दाखल झाले. तेथे उभ्या असलेल्या टाटा मॅजिक (क्र. MH-29-BE-0422) वाहनाची तपासणी केली असता चार गोवंश जनावरे अत्यंत कमी जागेत आणि आखूड दोरीने बांधलेल्या अवस्थेत आढळून आली.
यातील एका गायीचा मृत्यू झालेला असल्याचे निदर्शनास आले. तसेच जनावरांसाठी चारा व पाण्याची कोणतीही व्यवस्था नसल्याचे पोलिसांनी नमूद केले.तपासादरम्यान वाहनाजवळ उपस्थित असलेल्या मंगेश सुनिल नेहारे (वय २९) व रतन गोविंदा टेकाम (वय २७), दोघेही रा. रोहपट, ता. मारेगाव यांची चौकशी करण्यात आली.त्यानंतर पोलिसांनी अंबेझरी शिवारातील एका कोठ्यावर छापा टाकला. तेथे आणखी सहा गोवंश जनावरे आखूड दोरीने बांधलेल्या अवस्थेत आढळून आली.
या जनावरांसाठीही चारा-पाण्याची कोणतीही व्यवस्था नसल्याचे उघड झाले.कारवाईदरम्यान जिवंत व मृत जनावरे तसेच टाटा मॅजिक वाहन असा एकूण ३ लाख ५०० रुपयांचा मुद्देमाल जप्त करण्यात आला. पोलिसांनी पंचनामा करून जिवंत जनावरांची सुटका केली.या प्रकरणी मारेगाव पोलीस ठाण्यात भारतीय न्याय संहिता (BNS) कलम 325 व 3(5), महाराष्ट्र प्राणी रक्षण (सुधारणा) अधिनियम 1995 मधील कलम 5 (अ), (ब) तसेच प्राण्यांना क्रूरतेने वागविण्यास प्रतिबंध अधिनियम 1960 मधील संबंधित तरतुदींनुसार गुन्हा नोंदविण्यात आला आहे.सदर कारवाई ठाणेदार सागर दानडे यांचे मार्गदर्शनाखाली सफौ. दत्तु किनाके व सागर दिपेवार यांनी केली असून पुढील तपास सुरू आहे.
गोवंश जनावरांच्या कथित अवैध वाहतुकीविरोधात पोलिसांनी केलेल्या या तत्पर कारवाईमुळे परिसरात खळबळ उडाली असून नागरिकांकडून पोलिसांच्या कार्यवाहीचे कौतुक केले जात आहे.
