शहरातील १४ केंद्रांवर ४ हजार ७७० विद्यार्थी रविवारी २१ जून रोजी नीटची पुर्नपरीक्षा देतील. ही परीक्षा सुरक्षित, शांततेत व्हावी यासाठी जिल्हा प्रशासनाने जय्यत तयारी केली आहे. परीक्षेशी संबंधित सर्वच विभागांचा एकमेकांशी संपर्क असावा, यासाठी शनिवारी २० रोजी मॉक ड्रीलचे आयोजन करण्यात आले होते. प्रत्येक जबाबदार अधिकाऱ्यांनी आपले मोबाईल क्रमांक एकमेकांकडे दिले. त्यामुळे संपर्क साधण्यास मदत होणार आहे. रविवारी २१ जून रोजी लॉकरमधून नीटचे पेपर केंद्रांवर पाठवताना कोणतीही अडचण येऊ नये, हाच यामागील मुख्य उद्देश असल्याचे आरडीसी संतोष काकडे यांनी सांगितले. प्रत्येक परीक्षा केंद्रावर पोलिस अधिकाऱ्यांच्या हाती सुरक्षा व्यवस्था राहणार आहे. विद्यार्थ्यांना सकाळी ११ वाजतापासून दु. १.३० पर्यंत परीक्षा केंद्रावर पोहोचायचे आहे. दु. २ ते ५ या कालावधीत पेपर होणार आहे. केंद्रावर प्रवेश करण्याआधी विद्यार्थ्यांची बायोमॅट्रीक तपासणी होईल. प्रत्येक विद्यार्थ्याची तपासणी करून त्याला परीक्षा केंद्राच्या आत सोडले जाणार आहे. शहरात नीटच्या परीक्षेचे १४ केंद्र असून प्रत्येक केंद्रावर वेगळी गाडी पेपर घेऊन जाणार असून प्रत्येक गाडीला पोलीस व्हॅनचे संरक्षण मिळणार आहे. बँकेतील लॉकरमधून पेपर काढल्यानंतर ते संबंधित केंद्रात पोहोचेपर्यंत संपूर्ण यंत्रणा कार्यांवित राहणार आहे. प्रत्येक केंद्रांवर पोलीस अधिकाऱ्यांच्या नेतृत्त्वात तगडा पोलीस बंदोबस्त ठेवण्यात आला आहे. तसेच केंद्राजवळ विद्यार्थ्यांशिवाय इतरांना भटकताही येणार नाही. सीसीटीव्ही कॅमेरे तसेच विद्यार्थ्यांच्या बायोमॅट्रीक तपासणीची सोय करण्यात आली.
