बातमी ऐका (Marathi Voice Reader)
लासलगाव सकल माहेश्वरी समाजाच्या वतीने शहरात महेश नवमी उत्साहपूर्ण आणि भक्तिमय वातावरणात साजरी करण्यात आली. धार्मिक विधी, भव्य शोभायात्रा आणि महाप्रसादाच्या कार्यक्रमातून समाजातील ऐक्य, बंधुभाव आणि धार्मिक परंपरांचा जागर करण्यात आला. मंगळवारी (२३) सकाळी भगवान शंकरांचा अभिषेक सूरज मालपाणी यांच्या हस्ते सपत्नीक करण्यात आला. त्यानंतर विधिवत सत्यनारायण महापूजा पार पडली. पूजनानंतर माहेश्वरी समाजाच्या वतीने पारंपरिक वाद्यांच्या गजरात, जयघोष आणि भगवान महेश यांच्या नामस्मरणात गावातून शोभायात्रा काढण्यात आली. शोभायात्रेत महिला, युवक, ज्येष्ठ नागरिक तसेच बालकांनी मोठ्या उत्साहात सहभाग नोंदविला. यानंतर लक्ष्मीनारायण मंदिरात भगवान महेश यांची आरती व महेश वंदना करण्यात आली. दुपारी आयोजित महाप्रसादाचा भाविकांनी मोठ्या संख्येने लाभ घेतला. कार्यक्रमास लासलगाव व परिसरातील सकल माहेश्वरी समाजाचे पदाधिकारी, महिला, युवक आणि समाजबांधव मोठ्या संख्येने उपस्थित होते. महेश नवमी उत्सवाच्या माध्यमातून सामाजिक एकोप्याचा आणि धार्मिक संस्कारांचा संदेश देण्यात आला. दरम्यान, आयोजित उत्सवामुळे समाजबांधवांमध्ये उत्साहाचे आणि एकात्मतेचे वातावरण निर्माण झाले. नाशिक शहरात रविवार कारंजा येथून मुख्य मिरवणूक निघणार होती, मात्र, ऐन मिरवणुकीच्या वेळेसच पाऊस सुरू झाल्याने मिरवणूक रद्द करण्यात आली. नाशिकरोड येथेही मिरवणूक याच कारणाने रद्द करण्यात आली. इतर धार्मिक कार्यक्रम मात्र नियोजनानुसार पार पडले.
