बातमी ऐका (Marathi Voice Reader)
आई ही प्रत्येकाच्या आयुष्यातील पहिली गुरु, पहिली वैद्य आणि पहिली देवता असते. तिच्या मायेचे ऋण कधीही फेडता येत नाही, मात्र तिच्या स्मृतींना समाजसेवेची जोड दिली, तर त्या स्मृती खऱ्या अर्थाने अमर होतात. अशीच मातृभक्ती, समाजसेवेची जाणीव आणि संवेदनशीलतेचा सुंदर संगम एस. जे. एस. हॉस्पिटल’ येथे अनुभवायला मिळाला. उद्योगपती कैलास ठोळे यांनी मातोश्रींच्या स्मृतींना अभिवादन करत, एस. जे. एस. हॉस्पिटलच्या सहकार्याने महिला, गरजू नागरिक आणि ज्येष्ठांसाठी मोफत सर्वरोग निदान व आरोग्य तपासणी शिबिराचे आयोजन केले होते. ज्येष्ठ नागरिक संघाच्या अध्यक्षा सुधाभाभी ठोळे यांच्या हस्ते या शिबिराचा समारोप झाला. यावेळी हॉस्पिटलचे चेअरमन चांगदेव कातकडे, विजय कडू, ज्येष्ठ नागरिक संस्थेचे अध्यक्ष विजय बंब, हिरालाल महानुभाव, उत्तमभाई शहा, गुजराथी ताई, सुनील बोरा यांच्यासह नागरिक मोठ्या संख्येने उपस्थित होते. शिबिरात २५६ रुग्णांनी या शिबिराचा लाभ घेतला. आईच्या स्मृतींना सर्वात मोठी श्रद्धांजली म्हणजे समाजाच्या आरोग्याची जबाबदारी स्वीकारणे, हा संदेश ठोळे परिवाराने आपल्या कृतीतून दिला आहे. सेवा आणि समर्पणाच्या या त्रिसूत्रीवर उभा असलेला हा उपक्रम समाजासाठी मोठी प्रेरणा ठरला असून, या सेवाभावी कार्याचे सर्व स्तरांतून कौतुक होत आहे.
