बातमी ऐका (Marathi Voice Reader)
पुणे शहर पोलिसांनी अंमली पदार्थ तस्करीविरोधात मोठी कारवाई केली आहे. राजस्थानमध्ये धडक छापे टाकून पोलिसांनी आंतरराज्यीय एमडी (मेफेड्रॉन) तस्करी करणाऱ्या टोळीचा पर्दाफाश केला आहे. या कारवाईत एकूण 1 किलो 960 ग्रॅम मेफेड्रॉन जप्त करण्यात आले असून, सुमारे 4 कोटी 27 लाख 9 हजार रुपयांचा मुद्देमाल हस्तगत करण्यात आला आहे. या प्रकरणी सहा आरोपींना अटक करण्यात आली आहे. या कारवाईची सुरुवात 3 फेब्रुवारी 2026 रोजी पहाटे झाली. खराडी येथील ईऑन फेज-2 मागील गेटजवळ दोन संशयित इसम पांढऱ्या स्वीफ्ट कारमधून 27 ग्रॅम मेफेड्रॉनसह आढळून आले. त्यांच्या ताब्यातून 12 लाख 41 हजार रुपयांचा मुद्देमाल जप्त करण्यात आला. याप्रकरणी खराडी पोलीस ठाण्यात एनडीपीएस कायद्यान्वये गुन्हा दाखल करण्यात आला होता. तपासादरम्यान, अटक करण्यात आलेले आरोपी मोतीसिंह राजपुरोहित आणि हरीष रामदेवासी हे मूळचे राजस्थानमधील असल्याचे निष्पन्न झाले. गेल्या वर्षभरापासून ते राजस्थानमधील त्यांच्या संपर्कांद्वारे पुण्यात एमडीची विक्री करत असल्याची कबुली त्यांनी दिली. पुढील तपासात, योगेश ऊर्फ मनीष बिष्णोई याला वाघोली परिसरातून अटक करण्यात आली. त्याच्याकडून 151 ग्रॅम एमडी आणि मोबाईल असा 30 लाख 28 हजार रुपयांचा मुद्देमाल जप्त करण्यात आला. त्यानंतर सचिन ऊर्फ एसके बिष्णोई याला हडपसर-मुंढवा परिसरातून ताब्यात घेण्यात आले. त्याच्याकडून 4 लाख 65 हजार रुपये रोख आणि मोबाईल जप्त करण्यात आला. याशिवाय, मांजरी बुद्रुक येथील अमित घुले याला त्याच्या फॉर्च्युनर वाहनासह अटक करण्यात आली. त्याच्याकडून 398 ग्रॅम एमडी, दोन मोबाईल आणि वाहनासह 1 कोटी 2 लाख 40 हजार रुपयांचा मुद्देमाल जप्त झाला. या आंतरराज्यीय रॅकेटचा छडा लावण्यासाठी पोलीस आयुक्त अमितेश कुमार, पोलीस उप आयुक्त सोमय मुंडे आणि गुन्हे शाखेचे उप आयुक्त निखिल पिंगळे यांच्या मार्गदर्शनाखाली पाच तपास पथके राजस्थानला रवाना करण्यात आली. नुकतेच बालोतरा येथे रतनलाल जाठ याला अटक करून त्याच्याकडून 1 किलो 384 ग्रॅम एमडी, ज्याची किंमत सुमारे 2 कोटी 76 लाख 80 हजार रुपये आहे, जप्त करण्यात आले. तसेच, या प्रकरणात फरार असलेला आरोपी रामकरण जाट यालाही ताब्यात घेण्यात आले. या एकत्रित कारवाईत 3 कोटी 92 लाख रुपयांचे अंमली पदार्थ आणि 35 लाख 9 हजार रुपयांची वाहने व इतर साहित्य असा एकूण 4 कोटी 27 लाख रुपयांचा मुद्देमाल जप्त करण्यात आला. पुणे पोलिसांच्या या धडक कारवाईमुळे एमडी रॅकेटला मोठा धक्का बसला आहे.
