तालुका कृषी अधिकारी कु. दिपाली खवले यांचे शेतकऱ्यांना आवाहन
सुरेश पाचभाई पाचभाई, मारेगाव
मारेगाव तालुक्यात कृषी विभागातर्फे शेतकऱ्यांसाठी विकसित करण्यात आलेल्या अत्याधुनिक ‘महाविस्तार AI’ मोबाईल अॅपच्या प्रचाराला वेग आला आहे. तालुक्यातील सर्व शेतकऱ्यांनी हे अॅप तात्काळ डाउनलोड करून आधुनिक तंत्रज्ञानाचा लाभ घ्यावा, असे आवाहन तालुका कृषी अधिकारी कु. दिपाली खवले यांनी केले आहे.
कु. खवले म्हणाल्या, “महाविस्तार AI अॅपच्या सहाय्याने शेतकऱ्यांना किड-रोग ओळख, हवामान अंदाज, पिकनिहाय शिफारसी, बाजारभाव, शासकीय योजना तसेच तज्ञांचा सल्ला थेट मोबाईलवर मिळणार आहे. या सुविधेमुळे शेतकऱ्यांची निर्णयक्षमता वाढून उत्पादनात लक्षणीय वाढ होणार आहे.”
कृषी विभागातील अधिकारी व कर्मचारी गावागावांत जाऊन अॅप डाउनलोड प्रक्रिया, त्याचा वापर आणि फायदे याबाबत शेतकऱ्यांना मार्गदर्शन करत आहेत. अनेक ठिकाणी प्रात्यक्षिक सत्रे आयोजित करण्यात येत असून शेतकऱ्यांकडून या उपक्रमाला उत्स्फूर्त प्रतिसाद मिळत आहे.
सध्या तालुक्यात महाविस्तार AI अॅपचे मोठ्या प्रमाणावर डाउनलोडिंग सुरू असून, शंभर टक्के शेतकरी जोडणीचे लक्ष्य कृषि विभागाने निश्चित केले आहे.
“शेतीला आधुनिकतेची जोड देण्यासाठी महाविस्तार AI अॅप हा एक महत्त्वाचा टप्पा ठरणार आहे. प्रत्येक शेतकऱ्याने हे अॅप डाउनलोड करून तंत्रज्ञानाचा लाभ घ्यावा,” असे आवाहन कु. दिपाली खवले यांनी केले.