रेतीअभावी रखडले घरकुलधारक लाभार्थ्यांचे काम
सुरेश पाचभाई मारेगाव,
मारेगाव: तालुक्यातील घरकुलधारक लाभार्थ्यांना मोफत रेती मिळवून देणारा शासन आदेश निघाला. मात्र सध्यातरी तो हवेत विरला.रेतीच नसल्यामुळे घरकुलाचे बांधकाम रखडले.त्यामुळे घरकुलधारक लाभार्थ्यांना तारेवरची कसरत करावी लागत आहे.एकीकडे तालुक्यात केंद्र शासनाने गरजू नागरिकांना हक्काचे घर मिळावे म्हणून घरकूल योजना राबवली.
प्रधानमंत्री व इतर घरकुल आवास योजनेअंतर्गत २०२४ ते २०२५ या वर्षामध्ये गरजू लाभार्थ्यांना घरकुल मंजूर करण्यात आले. त्यामध्ये तालुक्यात प्रधानमंत्री आवास योजनेचे ३,१७६ घरे मंजुर झालीत. तर मोदी आवास योजनेची १,६७७, शबरी आवास योजनेची ८९८, आदिम आवास योजनेची ५२०, रमाई आवास योजनेची ३८६, पी.एम जनमन आवास योजनेची ८९१ घरकुले मंजुर करण्यात आली आहेत.
मंजुर घरकुलांसाठी शासनाकडून प्रत्येक लाभार्थ्यांला ५ ब्रास रेतीपुरवठा करण्याचा निर्णय घेण्यात आला. परंतु घरकुल मिळालेल्या लाभार्थ्यांना अद्यापही रेती मिळाली नसल्याने घरकुलांचे काम अर्धवट पडले आहे.घरकुलाचे बांधकाम आपल्याला पूर्ण करायचे असल्याने लाभार्थी आपले राहायचे कसेबसे मोडकळीस आलेले घर पाडत आहेत. आपले संसार ताडपत्रीच्या साह्याने उघड्यावर मांडले आहेत. रेतीअभावी त्यांचे घरकुलाचे काम रखडलेले आहे.
घरकुल लाभार्थ्यांना रेती उपलब्ध करून देण्यात यावी
मारेगाव तालुका हा आदिवासीबहुल तालुका म्हणून ओळखला जातो. पण येथील गरजवंतांना ग्रामीण भागात मोठ्या प्रमाणात प्रधानमंत्री घरकुल आवास योजनेअंतर्गत घरकुलाची कामे मंजूर करण्यात आली आहेत.परंतु शासनाकडून मिळत असलेली ५ ब्रास रेती लाभार्थ्यांना मिळत नाही. घरकुलाची कामे रखडली आहेत. त्यामुळे गवंडी कामगारांवर उपासमारीची वेळ आली आहे. प्रशासनाने लाभार्थ्यांना रेती उपलब्ध करून द्यावी. अशी मागणी घरकुल लाभार्थ्यांकडून होत आहे.
चोरीच्या रेतीला अधिकचे पैसे मोजावे लागतात
प्रशासनाने घरकुलधारक लाभार्थ्यांची गंभीर बाब लक्षात घेऊन तत्काळ रेती उपलब्ध करून द्यावी. अशी मागणी नागरिकांतून होत आहे. सध्या रेतीचा तुटवडा असल्याने चोरीच्या रेतीला अधिकचे पैसे मोजावे लागत आहेत. एकूणच रेती खरेदी-विक्रीच्या व्यवहारात नागरिकांची मोठी लूट होत असल्याचे चित्र संपूर्ण तालुक्यात दिसून येत आहे.
