जिल्हास्तरीय उत्कृष्ट ग्रामीण गृहनिर्माण अभियंता पुरस्काराने गौरव
सुरेश पाचभाई मारेगाव
मारेगाव दि. १५ ऑगस्ट २०२६ : प्रधानमंत्री आवास योजना-ग्रामीण तसेच राज्य पुरस्कृत ग्रामीण आवास योजनेंतर्गत उल्लेखनीय कामगिरी बजावत ग्रामीण गृहनिर्माण क्षेत्रात उत्कृष्ट कार्य करणाऱ्या पंचायत समिती मारेगाव येथील ग्रामीण गृहनिर्माण अभियंता कु. प्रतीक्षा गाडगे यांचा जिल्हास्तरीय ‘उत्कृष्ट ग्रामीण गृहनिर्माण अभियंता’ या विशेष पुरस्काराने गौरव करण्यात आला.
प्रजासत्ताक दिनानिमित्त आयोजित कार्यक्रमात यवतमाळचे पालकमंत्री मा.संजय भाऊ राठोड यांच्या हस्ते प्रतीक्षा गाडगे यांनी हा मानाचा पुरस्कार स्वीकारला. यावेळी जिल्हाधिकारी विकास मीना तसेच जिल्हा पोलीस अधीक्षक कुमार चिंता , मुख्य कार्यकारी अधिकारी संतोष धोत्रे, प्रकल्प संचालक जिल्हा ग्रामीण विकास यंत्रणा संचालक आनंद पिंगळे व प्रवीण मस्के यांच्यासह प्रशासनातील अधिकारी व मान्यवर उपस्थित होते.
ग्राम विकास विभाग, महाराष्ट्र शासनाच्या राज्य व्यवस्थापन कक्ष ग्रामीण गृहनिर्माण यांच्या वतीने राबविण्यात येत असलेल्या ‘महा आवास अभियान २०२५-२६’ अंतर्गत विविध उपक्रमांमध्ये उत्कृष्ट कामगिरी केल्याबद्दल प्रतीक्षा गाडगे यांना प्रशस्तीपत्र व सन्मानचिन्ह देऊन गौरविण्यात आले.
ग्रामीण भागातील गरजू कुटुंबांना हक्काचे घर मिळावे, घरकुल योजनांची प्रभावी अंमलबजावणी व्हावी तसेच पात्र लाभार्थ्यांना योजनांचा लाभ वेळेत मिळावा, यासाठी प्रतीक्षा गाडगे यांनी केलेल्या उल्लेखनीय कार्याची दखल जिल्हास्तरावर घेण्यात आली. त्यांच्या कार्यामुळे पंचायत समिती मारेगावच्या शिरपेचात आणखी एक मानाचा तुरा रोवला गेला आहे.
याप्रसंगी मिळालेला हा सन्मान केवळ वैयक्तिक पुरस्कार नसून ग्रामीण गृहनिर्माण क्षेत्रात प्रामाणिकपणे कार्य करणाऱ्या अधिकारी-कर्मचाऱ्यांच्या योगदानाचा गौरव असल्याची भावना व्यक्त होत आहे. या उल्लेखनीय यशाबद्दल प्रतीक्षा गाडगे यांचे सर्व स्तरांतून अभिनंदन होत आहे.
ग्रामीण विकासाच्या कार्याला पुरस्काराची पावती; मारेगावच्या शिरपेचात मानाचा तुरा!
