कळंब तालुका (प्रतिनिधी) : नितेश क्षीरसागर
कळंब येथील रासा रोडवरील श्री संत गजानन महाराज मंदिरात श्री संत गजानन महाराज प्रगटदिनानिमित्त भव्य धार्मिक व सांस्कृतिक कार्यक्रमांचे आयोजन करण्यात आले आहे. रविवार दि. १ फेब्रुवारी ते रविवार दि. ८ फेब्रुवारी २०२६ या कालावधीत हा सप्ताह भक्तिभावात साजरा करण्यात येणार आहे.
या सप्ताहात दररोज काकडा आरती, ग्रंथराज ज्ञानेश्वरीचे सामूहिक पारायण, हरिपाठ, महिला भजनी मंडळांचे भजन, नामवंत कीर्तनकारांची कीर्तने तसेच विविध सांस्कृतिक कार्यक्रमांचे आयोजन करण्यात आले आहे. लहान मुलांसाठी सांस्कृतिक कार्यक्रम, विनोदी काव्य व भारूड हे या सोहळ्याचे विशेष आकर्षण ठरणार आहे.
सोहळ्याच्या निमित्ताने रविवार दि. ८ फेब्रुवारी २०२६ रोजी सायंकाळी ४ ते रात्री ९ या वेळेत श्रींचा भव्य पालखी सोहळा संपन्न होणार आहे. या पालखी सोहळ्यात परिसरातील ३० हून अधिक महिला व पुरुष भजनी मंडळांचा सहभाग राहणार आहे. सहभागी भजनी मंडळांनी सकाळी ९ वाजता उपस्थित राहावे, असे आवाहन मंदिर समितीच्या वतीने करण्यात आले आहे. पालखी सोहळ्यासाठी रिक्षा व साउंड सिस्टिमची व्यवस्था संबंधित मंडळांनी स्वतः करावी, अशी विनंतीही करण्यात आली आहे.
पालखी सोहळ्याचे विशेष आकर्षण म्हणून साई बाबा महिला भजनी मंडळ (जळका), अविभाऊ घोडेवाले (कळंब), नारद मुनींच्या भूमिकेत श्री नरेंद्रभाऊ दुबे (कळंब) तसेच श्री गजराज कृपा धुमाल (कळंब) यांचा सहभाग राहणार आहे. भाविकांसाठी भव्य महाप्रसादाचे आयोजन करण्यात आले आहे.
रविवार दि. ८ फेब्रुवारी रोजी सकाळी श्रींचा अभिषेक, भव्य मिरवणूक, काल्याचे कीर्तन व दुपारी महाप्रसाद होणार आहे. सायंकाळी माता जगदंबा संगीत संच, देवळी यांच्या सुमधुर संगीत मैफिलीने या भक्तिमय सोहळ्याची सांगता होणार आहे.
दरम्यान, श्री संत गजानन महाराज मंदिराच्या संपूर्ण बांधकामासाठी देणगीदारांनी सहकार्य करावे, असे आवाहन मंदिर समितीच्या वतीने करण्यात आले आहे. भाविकांनी मोठ्या संख्येने उपस्थित राहून या धार्मिक व सांस्कृतिक सोहळ्याचा लाभ घ्यावा, असेही कळविण्यात आले आहे.सदर कार्यक्रमाचे आयोजन दिगंबर मस्के यांनी केले आहे.
