सदर महिलेला होते 14 दिवसाचे बाळ
सुरेश पाचभाई मारेगाव
रात्री अडीच वाजताच्या दरम्यान घरून निघून गेलेल्या महिलेचा मृतदेह अखेर गावातीलच विहिरीमध्ये आज सायंकाळी 6 वाजता आढळून आला.मनाला हेलकावून टाकणारी ही घटना तालुक्यातील बोटोनी येथे घडली.शुभांगी विपुल लालसरे वय अंदाजे 24 वर्षे असे मृत झालेल्या महिलेचे नाव आहे.
तालुक्यातील बोटोनी येथील शुभांगी हिचे एक वर्षांपूर्वी विपुल लालसरे यांचेसोबत लग्न झाले होते.त्यांना नुकतेच 14 दिवसापूर्वी बाळ जन्माला आले होते. बाळ, बाळाची आई दोघेही सुखरूप होते.अशातच दि.6 मे च्या मध्यरात्री अडीच वाजताच्या दरम्यान शुभांगी ही कोणालाही न सांगता घरून निघून गेली.
शुभांगी घरी आढळून न आल्याने घरच्यांनी तिचा सर्वत्र शोधाशोध केली.तसेच गावातील मित्रमंडळीच्या मदतीने गाव तसेच जवळपास सगळीकडे शोधले असता शुभांगी कोठेही आढळून आली नाही.शेवटी गावातच असलेल्या विहिरीजवळ शुभांगीच्या चपला आढळून आल्या. या संशयावरुण काहींनी विहिरीत गळसोडुन बघीतले असता शुभांगीचा मृतदेह विहिरीत आढळून आला.
========================
चिमुकल्याचा मातेसाठी टाहो ========================
अवघ्या 14 दिवसाचे असलेले शुभांगीचे बाळ मातेसाठी टाहो फोडतांना दिसले.आईच्या दुधासाठी चिमुकल्याचा जीव कासावीस झालेला होता.शुभांगीच्या मृत्यूने गावात शोककळा पसरलेली आहे. शुभांगीच्या पश्चात पती, सासु,सासरे,14 दिवसाचे बाळ असा आप्तपरिवार आहे.शुभांगीच्या मृत्यूचे कारण कळू शकले नाही.या प्रकरणाचा पुढील तपास ठाणेदार शंकर पांचाळ यांच्या मार्गदर्शनाखाली बीटजमदार किसन शंकुरवार करीत आहे.