सुरेश पाचभाई मारेगाव
मारेगाव: भारतीय जनता पक्षाच्या मारेगाव तालुका शाखेच्या वतीने रविंद्र सुधाकर टोंगे यांची भाजपा मारेगाव शहर सरचिटणीसपदी नियुक्ती करण्यात आली. तालुकाध्यक्ष अविनाश देविदास लांबट यांच्या अभिष्टचिंतन सोहळ्यात रविवार, दि. १६ ऑगस्ट रोजी टोंगे यांना नियुक्तीपत्र प्रदान करण्यात आले.
पक्षाने सोपविलेली जबाबदारी प्रामाणिकपणे पार पाडत मारेगाव शहरात पक्ष संघटनेचा विस्तार करण्यासोबतच भाजपची विचारधारा सर्वसामान्यांपर्यंत पोहोचविण्यासाठी प्रभावीपणे कार्य करण्याचा निर्धार रविंद्र टोंगे यांनी व्यक्त केला. बूथस्तरापासून संघटना अधिक मजबूत करून कार्यकर्त्यांना सोबत घेऊन पक्षाची ताकद वाढविण्यावर भर देणार असल्याचे त्यांनी सांगितले.
टोंगे यांच्या नियुक्तीमुळे मारेगाव शहरातील भाजपा संघटनेला नवी ऊर्जा मिळणार असून कार्यकर्त्यांमध्ये उत्साहाचे वातावरण निर्माण झाले आहे. आगामी काळात त्यांच्या नेतृत्वाखाली शहरात विविध संघटनात्मक उपक्रम राबवून पक्ष संघटना अधिक बळकट होण्याची अपेक्षा व्यक्त होत आहे.
नियुक्ती सोहळ्यास आदिवासी विकास मंत्री डॉ. अशोकराव उईके, भाजपा जिल्हाध्यक्ष प्रफुलजी चव्हाण, माजी आमदार संजीवरेड्डी बोदकूरवार, वणी नगराध्यक्षा विद्याताई आत्राम, ज्येष्ठ नेते दिनकरजी पावडे, तालुका महामंत्री प्रशांत नांदे आणि शहराध्यक्ष अनुप महाकुलकर यांची प्रमुख उपस्थिती होती.
नियुक्तीनंतर भाजपा पदाधिकारी, कार्यकर्ते व समर्थकांनी रविंद्र टोंगे यांचे अभिनंदन केले. पक्षाने टाकलेला विश्वास सार्थ ठरवून संघटनेच्या वाढीसाठी सातत्याने कार्य करण्याचा निर्धार टोंगे यांनी यावेळी व्यक्त केला.
