बातमी ऐका (Marathi Voice Reader)
Nashik Crime News : नाशिक येथील नाशिकरोड परिसरातील जुन्या बिटको रुग्णालयाजवळ एका टपरीवर उभे असलेल्या सुमित पगारे याच्यावर अज्ञात हल्लेखोरांनी अचानक प्राणघातक हल्ला केला. दिवसाढवळ्या घडलेल्या या गोळीबाराच्या घटनेमुळे संपूर्ण परिसरात तीव्र घबराट पसरली असून, कायदा व सुव्यवस्थेचा प्रश्न पुन्हा एकदा एरणीवर आला आहे.
मिळालेल्या माहितीनुसार, सुमित पगारे हा रुग्णालयाजवळील एका टपरीवर उभा असताना अचानक आलेल्या हल्लेखोरांनी त्याच्यावर हल्ला केला. काही समजण्याच्या आतच आरोपींनी त्याच्यावर रोखून गोळीबार केला. या थरारक हल्ल्यादरम्यान एक गोळी थेट सुमित याच्या पोटात घुसली, तर दुसरी गोळी त्याच्या बाजूने सुटून गेली. अचानक झालेल्या या गोळीबारामुळे परिसरात मोठी धावपळ उडाली आणि नागरिकांमध्ये घबराटीचे वातावरण निर्माण झाले. या संधीचा फायदा घेत हल्लेखोराने घटनास्थळावरून तातडीने पोबारा केला. गोळी लागल्याने सुमित पगारे रक्ताच्या थारोळ्यात जमिनीवर कोसळला.
स्थानिक नागरिकांनी तत्परता दाखवत गंभीर जखमी सुमित याला उपचारासाठी तातडीने जवळच्या खासगी रुग्णालयात दाखल केले. मात्र, पोटात गोळी लागल्याने झालेला अतिरक्तस्राव आणि गंभीर दुखापतीमुळे उपचारादरम्यान त्याचा मृत्यू झाला. डॉक्टरांनी त्याला मृत घोषित केल्यानंतर परिसरात हळहळ व्यक्त केली जात आहे.
घटनेची बातमी वाऱ्यासारखी पसरताच नाशिकरोड पोलीस ठाण्याचे वरिष्ठ अधिकारी आणि तपास पथक घटनास्थळी दाखल झाले. पोलिसांनी संपूर्ण परिसराची नाकेबंदी करून पहाणी सुरू केली आहे. हल्लेखोरांची ओळख पटवण्यासाठी आणि त्यांचा माग काढण्यासाठी आजूबाजूच्या परिसरातील सीसीटीव्ही (CCTV) फुटेज तपासण्याचे काम युद्धपातळीवर सुरू आहे.
