आकर्षक रोषणाई, धार्मिक मिरवणूक व युवकांच्या बाईक रॅलीने वेधले नागरिकांचे लक्ष
सुरेश पाचभाई मारेगाव
मारेगाव: शहरात हजरत मोहम्मद पैगंबर यांच्या जन्मदिनानिमित्त ईद-ए-मिलादुन्नबीचा पवित्र सण भक्तिमय व उत्साहपूर्ण वातावरणात शांततेत साजरा करण्यात आला. या निमित्ताने प्रेम, बंधुभाव, मानवता आणि सामाजिक ऐक्याचा संदेश देण्यात आला.
उत्सवानिमित्त गौसिया मशिदीवर करण्यात आलेली आकर्षक विद्युत रोषणाई नागरिकांचे लक्ष वेधून घेत होती. सकाळी मशिदीच्या प्रांगणात इस्लामिक ध्वज फडकवून धार्मिक कार्यक्रमांना सुरुवात करण्यात आली. नात शरीफच्या भक्तिमय सुरांनी परिसरात धार्मिक वातावरण निर्माण झाले होते.
मिरवणुकीत मक्का-मदीना आणि काबा शरीफच्या आकर्षक प्रतिकृती साकारण्यात आल्या होत्या. गौसिया मशीद कमिटीच्या युवकांनी शिस्तबद्ध पद्धतीने बाईक रॅली काढून उत्सवात सहभाग नोंदविला. मिरवणूक मार्गावर नागरिकांनी सरबत, मिठाई व अल्पोपहाराचे वाटप करून सामाजिक सलोख्याचे दर्शन घडविले.
ही मिरवणूक चांदशहा दर्गा, नगरपंचायत व माडी रोड मार्गे पुन्हा गौसिया मशिदीजवळ पोहोचली. उत्सव शांततेत व सुरळीत पार पडावा यासाठी मारेगाव पोलिसांनी आवश्यक बंदोबस्त ठेवला होता.
यानंतर झालेल्या धार्मिक सभेत मौलाना हाफिज रेहान रजा आणि हाफिज अब्दुस सलाम रशीदी यांनी पैगंबर मोहम्मद यांच्या जीवनकार्यावर प्रकाश टाकला. मानवता, परोपकार, गरजूंना मदत आणि बंधुभाव जपणे ही प्रेषितांची शिकवण असल्याचे त्यांनी यावेळी सांगितले.
युवकांचा नियोजनबद्ध सहभाग, नागरिकांचे सहकार्य आणि प्रशासनाच्या नियोजनामुळे मारेगावातील ईद-ए-मिलादुन्नबीचा सोहळा उत्साहपूर्ण व शांततामय वातावरणात संपन्न झाला.
