बातमी ऐका (Marathi Voice Reader)
जळगाव: खुनाच्या गुन्ह्यात बंदिस्त असलेल्या आकाश सपकाळे याचा वाढदिवस साजरा करण्यासाठी काहींनी थेट जळगावचे जिल्हा कारागृह गाठले. तसेच कारागृहाच्या संरक्षक भिंतीवरच रात्रीच्या वेळी फटाके फोडल्याचा धक्कादायक प्रकार समोर आला आहे. त्यानंतर पोलिसांनी या प्रकरणाची गंभीर दखल घेत पोलिसांनी विक्की गणेश शिंदे ऊर्फ छोटा माया आणि शुभम जाधव या दोघांना अटक केली. याप्रकरणी जिल्हा पेठ पोलीस ठाण्यात गुन्हा दाखल करण्यात आला आहे.
नेमकं घडलं काय?
जळगाव कारागृहाच्या भिंतीजवळ रात्रीच्या वेळी फटाके फोडण्यात आले होते. या फटाक्यांच्या ठिणग्या कारागृहाच्या आत गेल्या होत्या. त्यामुळे कॅन्टिनमधील मालमत्तेचे नुकसान झाले, तर कैद्यांच्या जीवाला देखील धोका निर्माण झाला होता. या प्रकाराचा व्हिडिओ सोशल मीडियावर व्हायरल झाला. त्यानंतर जिल्हा पेठ पोलिसांनी तातडीने कारवाई करत दोघांना बेड्या ठोकल्या.
आधी मैदानावर भेटला, मग प्रेमाचं नाटक आणि शेवटी…, महिला पोलिसासोबत नको ते घडलं, पतीच्या डिमांडनं हादरवून सोडलं
मित्राचा वाढदिवस म्हणून फोडले फटाके
पोलीस चौकशीतून याप्रकरणात धक्कादायक वास्तव समोर आले. आकाश सपकाळे हा खुनाच्या गुन्ह्यात 2021 पासून जळगाव जिल्हा कारागृहात न्यायालयीन कोठडीत आहे. यापूर्वीच त्याच्यावर नऊ गुन्हे दाखल आहेत. अशा परिस्थितीत त्याचा वाढदिवस साजरा करण्यासाठी विक्की गणेश शिंदे उर्फ छोटा माया, शुभम राहुल जाधव, विकास उर्फ गुड्ड्या संतोष भालेराव, विशाल गोसावी आणि गौरव उर्फ बंटी गौतम सपकाळे हे मध्यरात्री जिल्हा कारागृहाच्या परिसरात पोहोचले.
रात्री पोलिसांनी हटकताच पसार
कारागृहाच्या संरक्षक भिंतीजवळ पाच जणांनी फटाके फोडून वाढदिवस साजरा केला. रात्रीच्या वेळी कारागृहाच्या सुरक्षेच्या दृष्टीने अतिशय संवेदनशील असलेल्या ठिकाणी हा प्रकार सुरू असताना तो कर्तव्यावर असलेल्या कारागृह कर्मचाऱ्यांच्या निदर्शनास आला. कर्मचाऱ्यांनी त्यांना हटकताच सर्वजण तेथून पसार झाले.
कारागृह प्रशासनाकडून गंभीर दखल
फटाके फोडल्यामुळे उडालेल्या ठिणग्या संरक्षक भिंतीच्या आत गेल्या. त्यामुळे कारागृहातील कॅन्टीनमधील मालमत्तेचे नुकसान झाले. तसेच फटाक्यांमुळे कारागृहातील बंदींच्या जीवितास धोका निर्माण झाल्याने कारागृह प्रशासनाने या प्रकाराची गंभीर दखल घेतली. या घटनेचा व्हिडीओ सोशल मीडियावर मोठ्या प्रमाणात व्हायरल झाला. तुरुंग अधिकारी आणि कर्मचाऱ्यांनी व्हिडीओ पाहिल्यानंतर त्यातील संशयितांची ओळख पटवली.
घडलेल्या प्रकाराची माहिती वरिष्ठ तुरुंग अधिकारी ज्ञानेश्वर चव्हाण यांना देण्यात आली. त्यानंतर कारागृह प्रशासनाकडून जिल्हापेठ पोलिस ठाण्यात तक्रार दाखल करण्यात आली. तक्रारीनंतर स्थानिक गुन्हे शाखेच्या पथकाने तपासाची चक्रे वेगाने फिरवली. पोलिसांच्या रेकॉर्डवरील सराईत गुन्हेगार विक्की गणेश शिंदे उर्फ छोटा माया तसेच त्याचे साथीदार शुभम राहुल जाधव यांना ताब्यात घेण्यात आले.
दरम्यान, या प्रकरणातील आरोपींची दहशत कमी व्हावी आणि कायदा हातात घेणाऱ्यांना स्पष्ट संदेश जावा, यासाठी जिल्हापेठ पोलिसांनी आरोपींची शनीपेठ परिसरातून धिंड काढली.
