बातमी ऐका (Marathi Voice Reader)
पंढरपूर – शिंगांची रुबाबदार ठेवण, चाणाक्ष कान, चपळता आणि आकर्षक शरीरयष्टीच्या जोरावर ‘सोन्या’ने प्रत्येक प्रदर्शनात परीक्षकांचे मन जिंकले. या बैलाची ख्याती ऐकून शौकिनांनी व व्यापाऱ्यांनी तब्बल 10 लाख रुपयांपर्यंत बोली लावली. मात्र, एखाद्याने ‘थार’ गाडी देण्याची तयारी दर्शवली तरी सोन्या बैलाला विकणार नाही; तो आमच्या घराचा सन्मान आहे," असं मालक गणपत खपाले यांनी लोकल18 सोबत बोलताना सांगितलं.
पंढरपूरच्या शेतकऱ्याचा नादच खुळा
सध्याच्या यांत्रिक युगात ट्रॅक्टरचा वापर वाढल्याने शेतीतील बैल जोड्यांचे प्रमाण घटत आहे. मात्र, पंढरपूर तालुक्यातील गणपत खपाले या शेतकऱ्याला खिल्लार बैल पाळण्याचा छंद लागला आहे. आता त्यांच्या एका खिल्लार बैलाने संपूर्ण महाराष्ट्रात आपला वेगळा दरारा निर्माण केला आहे. खपाले यांनी पोटच्या पोराप्रमाणे जोपासलेल्या ‘सोन्या’ नावाचा खिल्लार बैल विविध प्रदर्शनांमध्ये सलग 11 वेळा चॅम्पियन ठरला आहे.
भीमा नदीच्या काठचं हे ऐतिहासिक गाव, तब्बल 11 महिने चाल होता दिल्लीचा कारभार, औरंगजेबाच्या काळात काय घडलं? VIdeo
’सोन्या’च्या बळावर कुटुंबाची प्रगती
कधीकाळी घरात साधी सायकल होती. शेतीला जोडधंदा म्हणून जर्शी गाय पाळत होतो. परिस्थिती अगदी जेमतेम होती. घरी एक देशी गाय होती. त्यानंतर बैल घेतला आणि आमचं भाग्य बदललं. मग, बैल पाळण्याचा नाद लागला. हे बैल वेगवेगळ्या स्पर्धा जिंकायला लागले. हिंदकेसरी झाले. त्यामुळे आमची परिस्थिती देखील सुधारत गेली. दोन मुलांना इंजिनिअर बनवलं. एक मुलगी मुंबई पोलीस झाली. भावाची मुलं देखील वेगवेगळ्या क्षेत्रात चांगल्या पदांवर गेली. एवढी सगळी प्रगती बैलांमुळेच झाल्याचं खपाले सांगतात.
गावात एक कोटीचा बंगला
‘सोन्या’ आणि इतर बैलांमुळे आमचे दिवस बदलले. आता गावात 1 कोटी रुपयांच्या आलिशान बंगल्याचे काम सुरू आहे. या बंगल्यावर आम्ही बैलजोडीची प्रतिकृती उभारणार आहोत. याला 3-4 लाखांपर्यंत खर्च येईल. पण या बैलांमुळे आमची महिन्याची 2-3 लाखांपर्यंत आहे. त्यांनीच हे चांगले दिवस दाखवले. त्यामुळे जोपर्यंत बैल आहेत, तोपर्यंत कुटुंबातील सदस्याप्रमाणे सांभाळणार आहे. त्यांना कधीच विकणार नाही, असंही खपाले म्हणतात.
दरम्यान, केवळ शेतीपुरता विचार न करता देशी खिल्लार जातीचे संवर्धन आणि जतन करण्याच्या उद्देशाने खपाले यांनी हा छंद जपला आहे. सध्या ‘सोन्या’ आणि इतर बैलांना पाहण्यासाठी खपाले यांच्या घरी शौकिनांची मोठी गर्दी होत असून ग्रामीण भागातून त्यांच्यावर अभिनंदनाचा वर्षाव होत आहे.
