बातमी ऐका (Marathi Voice Reader)
छत्रपती संभाजीनगर: तुरीच्या शेतात गांजा लागवड करून शेतकऱ्याचा बक्कळ कमाईचा डाव फसला. छत्रपती संभाजीनगरमधील फुलंब्री तालुक्यातील लालवन शिवारात पोलिसांनी मोठी कारवाई केली. यामध्ये गांजाची १ क्विंटल ५ किलो वजनाची १४१ झाडे जप्त करण्यात आली. याप्रकरणी ६६ वर्षीय चैनसिंग रतनसिंग बिमरोटे यांना अटक करण्यात आली आहे. तसेच त्यांच्याकडून ५२ लाख ९७ हजार ५०० रुपयांचा मुद्देमाल पोलिसांमार्फत ताब्यात घेण्यात आला आहे.
नेमकं प्रकरण काय?
झटपट श्रीमंत होण्याच्या नादात फुलंब्री तालुक्यातील लालवन शिवारात शेतकऱ्याने तुरीच्या शेतात गांजाची लागवड केली होती. पाडळी एकफाटा शिवारातील गट क्रमांक २८ मध्ये गांजाची लागवड झाल्याची माहिती पिशोर पोलिसांना मिळाली. त्यानुसार पोलिसांनी थेट कारवाई करत गांजा शेतीचा भांडाफोड केला. तेव्हा शेतात गांजाची १४१ झाडे आढळली.
पतीसोबत वाद, विवाहितेनं रागानं घर सोडलं, त्यानं रात्री रिक्षात बसवलं अन् पहाटे…, भयंकर कृत्यानं छ. संभाजीनगर हादरलं!
पोलिसांनी ५२ लाख ९७ हजार ५०० रुपयांचा एक क्विंटल ५ किलोचा मुद्देमाल जप्त केला. तसेच ६६ वर्षीय चैनसिंग रतनसिंग बिमरोटे यांना अटक केली. त्यांच्याविरुद्ध अमली पदार्थ व मनःप्रभावी पदार्थ अधिनियम १९८५ अर्थात NDPS कायद्यान्वये गुन्हा दाखल करण्यात आला आहे. ही कारवाई पोलीस अधीक्षक डॉ. प्रकाश जाधव, अपर पोलीस अधीक्षक प्रशांत स्वामी आणि सहायक पोलीस अधीक्षक अपराजिता अग्निहोत्री यांच्या मार्गदर्शनाखाली करण्यात आली. या प्रकरणाचा पुढील तपास सहायक पोलीस निरीक्षक कुणाल सूर्यवंशी करीत आहेत.
