बातमी ऐका (Marathi Voice Reader)
पुणे : पुणे आंतरराष्ट्रीय विमानतळावर एक अतिशय धक्कादायक आणि विचित्र प्रकार समोर आला आहे. यात विमानतळावर प्रवाशांच्या सामानाची तपासणी सुरु होती. दरम्यान अधिकाऱ्यांना मिळालेल्या गोपनीय माहितीनुसार, बँकॉकहून आलेल्या भारतीय प्रवाशाच्या बॅगचीही तपासणी करण्यात आली. मात्र, त्यात काहीही संशयास्पद आढळलं नाही. पण या प्रवाशाच्या पायातील स्पोर्ट्स शूज बघताच अधिकाऱ्यांना संशय आला. शेवटी या शूजचे सोल कापताच धक्कादायक खुलासा झाला.
काय घडलं?
सीमाशुल्क अधिकाऱ्यांना गोपनीय माहिती मिळाली होती. यासोबतच प्रवाशाच्या हालचाली संशयास्पद वाटल्यानं या निरीक्षणातून ही तपासणी करण्यात आली. बँकॉकहून एयर इंडिया एक्सप्रेसच्या आयएक्स-२९१ या विमानाने आलेल्या प्रवाशाची अधिकाऱ्यांनी तपासणी केली. त्याच्या सामानात सुरुवातीला काहीही संशयास्पद आढळलं नाही. मात्र, त्याने घातलेल्या काळ्या स्पोर्ट्स शूजकडे बघताच संशय आला. त्याच्या पायातील शूजचं वजन आणि सोलची जाडी संशयास्पद वाटल्याने अधिकाऱ्यांनी बुटांची बारकाईने तपासणी केली. बुटांचे सोल कापून तपासणी केली असता, त्यामध्ये खास कप्पे तयार करून पॅकेट्स लपवल्याचे आढळले.
प्रवाशाने स्पोर्ट्स शूजच्या सोलमध्ये अंमलीपदार्थ लपवला होता. या कारवाईत ३८९.२७ ग्रॅम हशिश जप्त करण्यात आले, त्याची आंतरराष्ट्रीय बाजारातील किंमत सुमारे १३ लाख ५० हजार रुपये आहे. याप्रकरणी प्रवाशाला अटक करण्यात आली. न्यायालयाने त्याला ७ नोव्हेंबरपर्यंत न्यायालयीन कोठडी सुनावली आहे. मात्र, प्रवाशानं वापरलेली ही पद्धत पाहून अधिकारीही चक्रावून गेले.
