मारेगाव तालुक्यातील घटना
सुरेश पाचभाई मारेगाव
मारेगाव तालुक्यातील पार्डी येथील वर्धा नदीपात्रात अनोळखी व्यक्तीचा मृतदेह नदीपात्रात तरंगत असल्याची घटना तालुक्यातील पार्डी येथे आढळून आली. सदर घटनेची माहिती पार्डी येथील पोलीस पाटील यांनी मारेगाव पोलिसांना कळविली.मारेगाव पोलिसांनी घटनेचे गांभीर्य लक्षात घेत लगेचच पार्डी गाठत मृतदेहाला बाहेर काढले.
मारेगाव तालुक्याच्या उत्तरेला वर्धा नदी वाहते.नेहमीप्रमाणे वर्धा नदीच्या काठावर शेती असल्याने येथील पोलीस पाटील प्रकाश बालाजी बदखल हे आज दि. 23 मार्चला सकाळी 7.30 वाजता पाण्याची मोटर सुरु करण्याकरिता शेतामध्ये गेले.त्यांच्या बाजूलाच त्यांचे काका खुशाल बदखल यांची शेती आहे.
त्यांच्या शेताच्या बाजूलाच नदीमध्ये एका अनोळखी इसमाचे प्रेत तरंगताना प्रकाश बदखल यांना आढळून आले. या इसमाचे वय अंदाजे 35 ते 40 च्या दरम्यान असून त्याचे अंगात निळा पॅन्ट आणि काळा लालसर चेकचा शर्ट घातलेला आहे. सदर घटनेची माहिती मारेगाव पोलिसांना लगेचच दिली. माहिती मिळताच मारेगाव पोलीस घटनास्थळी दाखल झाले.
घटनास्थळ पंचनामा करून अनोळखी अंदाजे वय 35 ते 40 वर्षाच्या व्यक्तीचा मृतदेह मारेगाव येथील ग्रामीण रुग्णालयात उत्तरीय तपासणीसाठी पाठविण्यात आला आहे. सदर व्यक्तीची ओळख पटलेली नाही.सदर घटनेचा पुढील तपास पोलीस उपनिरीक्षक सुधाकर गावंडे यांचे मार्गदर्शनात जमादार शंकर बारेकर करत आहे.
