परिवर्तन विचारांची प्रेरणादायी जागृती
सुरेश पाचभाई, मारेगाव
मारेगाव येथे जागतिक समाजसुधारक महात्मा ज्योतिबा फुले यांची १९९ वी जयंती परिवर्तन विचारांच्या प्रभावी वातावरणात उत्साहात साजरी करण्यात आली. जिजाऊ चौक परिसरात आयोजित कार्यक्रमात महात्मा फुले यांच्या प्रतिमेस पुष्पमाला अर्पण करून अभिवादन करण्यात आले. या कार्यक्रमाला माळी महासंघ, मराठा सेवा संघाचे पदाधिकारी तसेच महिला-पुरुषांची उल्लेखनीय उपस्थिती होती.
कार्यक्रमाची सुरुवात राष्ट्रपिता महात्मा ज्योतिबा फुले व क्रांतीज्योती सावित्रीबाई फुले यांच्या प्रतिमेस पुष्प अर्पण करून झाली. उपस्थित मान्यवरांनी आपल्या भाषणातून फुले दाम्पत्यांच्या क्रांतिकारी कार्याचा गौरव करत बहुजन समाजासाठी त्यांनी शिक्षणाची दारे खुली करून सामाजिक परिवर्तनाचा पाया रचल्याचे अधोरेखित केले.
यावेळी माजी जिल्हा परिषद सदस्य रामचंद्र सोयाम, नारायण शेंडे, मराठा सेवा संघाचे विभागीय उपाध्यक्ष इंजि. अनंत मांडवकर, मार्गदर्शक अनामिक बोढे, माळी महासंघाचे कार्तिक शेंडे, अक्षय सोनुले, राजू शेंडे आदींसह अनेक मान्यवर व महिलांची मोठ्या संख्येने उपस्थिती होती.
संपूर्ण कार्यक्रमात परिवर्तन, शिक्षण आणि सामाजिक समतेचा संदेश देत महात्मा फुले यांच्या विचारांची प्रेरणादायी उजळणी करण्यात आली. मारेगावातील हा सोहळा समाजजागृतीचा प्रभावी संदेश देणारा ठरला.
