भाजप तालुकाध्यक्ष अविनाश लांबट यांचा दिमाखदार गौरव; अभिनेत्री वर्षा उसगांवकर यांच्या हस्ते सन्मान
सुरेश पाचभाई | मारेगाव
मारेगाव तालुक्याच्या राजकीय आणि सामाजिक क्षेत्रात झंझावात ठरलेले भारतीय जनता पार्टीचे तालुकाध्यक्ष अविनाश लांबट यांना नागपूर येथे प्रतिष्ठेचा “अचिव्हर अवॉर्ड २०२६” प्रदान करून गौरविण्यात आले. अभिरुचि फाउंडेशन तर्फे आयोजित भव्य सोहळ्यात सुप्रसिद्ध अभिनेत्री वर्षा उसगांवकर यांच्या हस्ते हा मानाचा पुरस्कार देण्यात आला. या क्षणाने मारेगाव तालुक्याचा लौकिक राज्यपातळीवर झळकला.
सामाजिक व राजकीय कार्याची राज्यस्तरीय दखल
महाराष्ट्रातील विविध क्षेत्रांत उल्लेखनीय कामगिरी करणाऱ्या कर्तृत्ववान व्यक्तींना दरवर्षी गौरविण्याची परंपरा जपणाऱ्या अभिरुचि फाउंडेशनने यंदा अविनाश लांबट यांच्या अष्टपैलू कार्याची दखल घेत त्यांची निवड केली.जनतेच्या प्रश्नांसाठी रस्त्यावर उतरून संघर्ष करणारे, विकासकामांसाठी सातत्याने पाठपुरावा करणारे आणि संघटन कौशल्याने कार्यकर्त्यांना एकत्र ठेवणारे नेतृत्व म्हणून त्यांची ओळख आहे.
जनसेवेचा ध्यास, विकासाचा वेग
मारेगाव तालुक्यातील पायाभूत सुविधा, शेतकरी प्रश्न, युवकांना संधी आणि सामाजिक उपक्रम या सर्वच आघाड्यांवर त्यांनी भरीव कामगिरी केली आहे. राजकारणाला केवळ सत्तेचे साधन न मानता समाजकारणाची जोड देत त्यांनी विकासाचा वेग कायम ठेवला. त्यांच्या या निष्ठावान कार्याची पावती म्हणजेच ‘अचिव्हर अवॉर्ड २०२६’ होय.
टाळ्यांच्या कडकडाटात गौरव
नागपूरातील दिमाखदार सोहळ्यात अभिनेत्री वर्षा उसगांवकर यांच्या हस्ते सन्मान स्वीकारताना उपस्थितांनी टाळ्यांच्या कडकडाटात अभिनंदन केले. हा पुरस्कार केवळ वैयक्तिक नसून संपूर्ण मारेगाव तालुक्याचा सन्मान असल्याची भावना यावेळी व्यक्त झाली.
कार्यकर्त्यांचा विश्वास दुणावला
“अविनाश लांबट यांच्या रूपाने खऱ्या लोकसेवकाचा गौरव झाला आहे. त्यांच्या कार्याची ही अधिकृत पावती असून भविष्यात ते अधिक जोमाने जनसेवेसाठी झटतील,” अशा भावना कार्यकर्त्यांनी व्यक्त केल्या.
या यशामुळे मारेगाव तालुक्यात आनंदाचे वातावरण असून सर्व स्तरांतून त्यांच्यावर अभिनंदनाचा वर्षाव होत आहे. आगामी काळातही विकासाची ही घोडदौड अशीच सुरू राहो, अशी अपेक्षा नागरिकांनी व्यक्त केली आहे.
