तालुका प्रतिनिधी, वणी
वणी:तालुक्यातील सोमनाळा फाट्यापासून काही अंतरावर आज (11 डिसेंबर 2025) गुरुवारी सायंकाळी सहा वाजताच्या सुमारास अज्ञात वाहनाच्या धडकेत दुचाकीस्वाराचा जागीच मृत्यू झाला तर एक जण गंभीर जखमी झाला. या अपघाताने परिसरात हळहळ व्यक्त केली जात आहे.
मृतकाचे नाव प्रवीण तुळशीराम येरमे (वय 42, रा. पांढरकवडा,(पिसगाव)ता. मारेगाव) असे असून, त्यांचा चुलत भाऊ रवींद्र येरमे हे गंभीर जखमी झाले आहेत. प्रवीण यांच्या पश्चात आई ,वडील, पत्नी, दोन मुली असा परिवार आहे.
मिळालेल्या माहितीनुसार, प्रवीण येरमे हे काही कामानिमित्त वणी येथे गेले होते. काम आटोपून मारेगावकडे परतत असताना अज्ञात वाहनाने त्यांच्या दुचाकी (क्रमांक MH 29 AJ 6220) ला जोरदार धडक दिली. या भीषण धडकेत प्रवीण यांचा जागीच मृत्यू झाला, तर रवींद्र येरमे गंभीर जखमी झाले.
जखमींना रस्त्याने जाणाऱ्या नागरिकांनी तत्काळ वणी येथील ग्रामीण रुग्णालयात उपचारासाठी दाखल केले. अज्ञात वाहनचालकाचा शोध घेत असून, पोलीस पुढील तपास करीत आहेत.