बातमी ऐका (Marathi Voice Reader)
महाराष्ट्र आणि कर्नाटकसह इतर राज्यातील जग जोगत्यांचे आणि भाविकांचे आराध्य दैवत असणाऱ्या पंढरपूर तालुक्यातील कासेगावच्या यल्लम्मा देवीच्या यात्रेस सुरुवात झाली. कासेगाव (ता. पंढरपूर) येथील ग्रामदैवत असलेल्या श्री यल्लमा देवीच्या यात्रेसाठी महाराष्ट्र, कर्नाटक राज्यातून तसेच आंध्रप्रदेश, तेलंगणा या राज्यातून दोन ते अडीच लाख भाविक दाखल झाले आहेत. देशभरातून हजारो तृतीयपंथी जगजोगतीणी या यात्रेसाठी दाखल झाले आहेत. आज यात्रेचा पहिला दिवस असून श्री यल्लमा देवीच्या दर्शनासाठी आलेल्या भाविकांची गैरसोय होऊ नये आणि कोणताही अनुसूचित प्रकार घडू नये म्हणून पोलिस प्रशासनाच्या वतीने मंदिराकडे येणाऱ्या सर्व रस्त्यावर बॅरिकेड्स लावण्यात आले. सर्व चारचाकी व तसेच दुचाकी वाहनांना मंदिराकडे प्रवेश बंद करण्यात आला. त्या सर्व वाहनांची पार्किंगमध्ये व्यवस्था करण्यात आली. आज बुधवारी यात्रेचा अखेरचा दिवस असून यादिवशी किचेचा पारंपरिक कार्यक्रम झाल्यानंतर यात्रा समाप्त होत आहे. यात्रेत येणाऱ्या भाविकांच्या मनोरंजनासाठी पाळणे व खेळण्याचे स्टॉल लावण्यात आले आहेत. तसेच हॉटेल आणि दुकानदारांनी आपले दुकाने थाटली आहेत. यात्रेसाठी महाराष्ट्र राज्य परिवहन महामंडळाकडून भाविकांच्या सोयीसाठी जादा बसेस सोडण्यात आले आहेत. पंढरपूर तालुक्याचे पोलिस निरीक्षक टी.वाय.मुजावर यांच्याकडूनही यात्रेतील भाविकांची गैरसोय होऊ नये आणि कोणत्याही प्रकारचा अनुसूचित प्रकार घडू नये म्हणून चोख पोलिस बंदोबस्त ठेवण्यात आला होता. यात्रेच्या पहिल्या दिवशी नैवेद्य दाखवण्याचा पारंपरिक उत्सव असतो. यामध्ये कासेगावचे मानकरी भाऊसाहेब देशमुख यांचा मानाचा नैवेद्य देवीला दाखवून आल्यानंतर मानाचा लिंब, गंध हा विधी सुरु करण्यात आला. लिंबगंध कासेगावचे मानकरी वसंतराव देशमुख यांचे सुपुत्र संग्रामसिंह देशमुख याचा असतो. श्री यल्लमा देवीचे यात्रेत मानाचा लिंबगंध आणि नैवेद्य का कार्यक्रम पाहण्यासाठी भाविकांची मोठी गर्दी होत असल्याचे पाहायला मिळत आहे.
