सुरेश पाचभाई मारेगाव,
मारेगाव : तालुक्यातील मांगरुळ येथील सुपुत्र, राजकीय विश्लेषक व साहित्यिक प्रा. डॉ. संतोष डाखरे यांच्या ‘राजकीय नेतृत्व’ या पुस्तकाचे प्रकाशन नुकतेच महाराष्ट्र राज्याचे माजी मुख्यमंत्री तथा शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्या हस्ते पार पडले.
प्रा. डॉ. संतोष डाखरे हे मागील पंधरा वर्षांपासून भामरागड येथील महाविद्यालयात राज्यशास्त्र विभागप्रमुख म्हणून कार्यरत आहेत. विविध वृत्तपत्रांमधून ते आंतरराष्ट्रीय विषयांवर सातत्याने लेखन करीत असून त्यांचे शैक्षणिक व वैचारिक योगदान उल्लेखनीय आहे.
गोंडवाना विद्यापीठाच्या राज्यशास्त्र अभ्यास मंडळाचे सदस्य म्हणूनही त्यांनी काम केले असून त्यांची काही पुस्तके विद्यापीठात संदर्भग्रंथ म्हणून समाविष्ट करण्यात आली आहेत.या प्रसंगी वणी विधानसभा मतदारसंघाचे शिवसेना (उ. बा. ठा.) आमदार संजय देरकर यांची प्रमुख उपस्थिती होती.
पुस्तकाचे कौतुक करताना उद्धव ठाकरे यांनी सांगितले की, ‘राजकीय नेतृत्व’ हे पुस्तक राजकारणात येऊ इच्छिणाऱ्या तसेच सध्या कार्यरत असलेल्या व्यक्तींना निश्चितच दिशादर्शक ठरेल.कार्यक्रमास विविध क्षेत्रांतील मान्यवर, साहित्यप्रेमी व राजकीय कार्यकर्ते उपस्थित होते.
