सुरेश पाचभाई मारेगाव
मारेगाव तालुक्यातील ग्रामपंचायत कानडा पार्डीच्या वतीने थोर समाजसुधारक संत गाडगेबाबा यांची ६९ वी पुण्यतिथी आज (दि. २० डिसेंबर) मोठ्या उत्साहात साजरी करण्यात आली. या कार्यक्रमाचे अध्यक्षस्थान ग्रामपंचायत सरपंच सौ. सुषमा रुपेश ढोके यांनी भूषविले.
कार्यक्रमाच्या प्रारंभी संत गाडगेबाबा यांच्या तैलचित्राचे पूजन करण्यात आले. त्यानंतर त्यांच्या स्वच्छता व समाजसेवेच्या विचारांना अनुसरून स्वच्छता अभियान राबविण्यात आले. भजनाच्या निनादात गावातून स्वच्छता जनजागृती रॅली काढण्यात आली. या रॅलीद्वारे स्वच्छतेचा संदेश नागरिकांपर्यंत पोहोचविण्यात आला. यावेळी उपस्थितांना स्वच्छतेचे महत्त्व पटवून देत सर्वांनी स्वच्छतेची शपथ घेतली.
या उपक्रमात गावातील महिला व पुरुष नागरिक, जिल्हा परिषद शाळेचे विद्यार्थी व शिक्षक, पोलीस पाटील, अंगणवाडी सेविका, आशा सेविका व मदतनीस, महिला भजन मंडळ, गुरुदेव सेवा मंडळ, ग्रामपंचायत उपसरपंच तसेच सर्व सदस्य मोठ्या संख्येने सहभागी झाले होते.
कार्यक्रमाची सांगता राष्ट्रवंदनेने करण्यात आली. कार्यक्रमाचे सूत्रसंचालन ग्रामसेवक प्रभाकर फुलभोगे यांनी केले, तर आभार प्रदर्शन सामाजिक कार्यकर्ते सूरज येवले यांनी मानले.संत गाडगेबाबा यांच्या स्वच्छता, साधेपणा व समाजसेवेच्या विचारांना उजाळा देणारा हा उपक्रम ग्रामस्थांच्या सक्रिय सहभागामुळे यशस्वी ठरला.
