अदानी उद्योग समूहाचे अध्यक्ष गौतम अदानी आज बारामती दौऱ्यावर असून, त्यांच्या हस्ते ‘शरद पवार सेंटर ऑफ एक्सलन्स इन आर्टिफिशियल इंटेलिजन्स’चे मोठ्या उत्साहात उद्घाटन करण्यात आले. विशेष म्हणजे, या सोहळ्याच्या निमित्ताने गेल्या अनेक महिन्यांपासून राजकीय प्रवाहात दोन टोकांवर असलेले पवार कुटुंब पुन्हा एकदा एकत्र पाहायला मिळाले. गौतम अदानी यांच्या स्वागतापासून ते मंचापर्यंत संपूर्ण पवार कुटुंबाने उपस्थिती लावल्याने राजकीय वर्तुळात अनेक तर्क-वितर्क लढवले जात आहेत. गौतम अदानी यांचे बारामतीत आगमन होताच रोहित पवार आणि अजित पवार त्यांच्या स्वागतासाठी दाखल झाले होते. आमदार रोहित पवार यांनी स्वतः गौतम अदानी यांच्या कारचे सारथ्य केले, तर त्यांच्या बाजूला उपमुख्यमंत्री अजित पवार बसले होते. या गाडीतून अदानी विद्या प्रतिष्ठानच्या संकुलात पोहोचले. यावेळी राष्ट्रवादी काँग्रेस शरद पवार गटाचे अध्यक्ष शरद पवार, खासदार सुप्रिया सुळे, राज्यसभा खासदार सुनेत्रा पवार आणि कुटुंबातील इतर सदस्य अदानींच्या स्वागताला हजर होते.
शरद पवार,अजित पवारांच्या मध्ये अदानींची खुर्ची ‘शरद पवार सेंटर ऑफ एक्सलन्स इन आर्टिफिशियल इंटेलिजन्स’चे उद्घाटनावेळी शरद पवार, अजित पवार, सुनेत्र पवार, सुप्रिया सुळे हे सर्व एकाच मंचावर बसल्याचे पाहायला मिळाले. यावेळी अजित पवार आणि शरद पवार दोघांच्या मध्ये गौतम अडाणी यांची खुर्ची ठेवण्यात आली होती. गौतम अदानींनी यापूर्वीही दिली बारामतीत भेट ज्या ‘सेंटर ऑफ एक्सलन्स’चे आज उद्घाटन झाले, ते केंद्र पूर्णपणे अदानी समूहाने दिलेल्या निधीतून उभारण्यात आले आहे. पवार कुटुंब चालवत असलेल्या ‘विद्या प्रतिष्ठान’ या नामांकित शैक्षणिक संस्थेअंतर्गत हे केंद्र काम करणार आहे. २०२२ मध्येही गौतम अदानी यांनी पत्नीसह बारामतीला भेट देऊन ‘विज्ञान आणि नवोन्मेष क्रियाकलाप केंद्रा’च्या उद्घाटनात सहभाग घेतला होता. मात्र, आजचा हा दौरा अशा वेळी होत आहे जेव्हा दोन्ही राष्ट्रवादी काँग्रेसमध्ये (अजित पवार गट आणि शरद पवार गट) पुन्हा एकदा आघाडी किंवा जवळिकीबाबत वेगवान घडामोडी घडत आहेत. हे राजकारण नाही, तर समाजकारण – रोहित पवार काँग्रेसकडून पंतप्रधान नरेंद्र मोदी आणि गौतम अदानी यांच्या संबंधांवर सतत टीका होत असताना, शरद पवार आणि गौतम अदानी यांचे एकत्र येणे राजकीयदृष्ट्या संवेदनशील मानले जात आहे. या भेटीवर राजकीय टीका होऊ नये यासाठी आमदार रोहित पवार यांनी स्पष्टीकरण दिले आहे. ते म्हणाले, “गौतम अदानी आणि शरद पवार यांच्यातील भेटी या प्रामुख्याने सामाजिक कार्यासाठी असतात. त्यामुळे या कार्यक्रमाला केवळ राजकारणाच्या चष्म्यातून पाहणे चुकीचे आहे.” आजच्या भारतात AI चा अर्थ ‘अदानी इन्फ्लुएन्स’ दुसरीकडे, सामाजिक कार्यकर्ते विजय कुंभार यांनी या सोहळ्यावर उपरोधिक टीका केली आहे. ते म्हणाले, “आजच्या भारतात AI चा अर्थ ‘आर्टिफिशियल इंटेलिजन्स’ नसून ‘अदानी इन्फ्लुएन्स’ (Adani Influence) असा झाला आहे.”
