बातमी ऐका (Marathi Voice Reader)
हिंगोली शहरातील कमलानगर भागात भांडण सोडविण्यासाठी गेलेल्या पोलिस कर्मचाऱ्यावर दहा ते बारा जणांनी हल्ला करून गंभीर जखमी केल्याची घटना गुरुवारी ता. १ पहाटे घडली आहे. जखमी पोलिस कर्मचाऱ्यास उपचारासाठी हिंगोलीच्या शासकीय रुग्णालयात दाखल करण्यात आले आहे. या प्रकरणात पोलिसांनी चौघांना चौकशीसाठी ताब्यात घेतले आहे. हिंगोली शहरासह जिल्हाभरात थर्टीफर्स्ट निमित्त कायदा व सुव्यवस्थेचा प्रश्न निर्माण होऊ नये यासाठी वाढीव पोलिस बंदोबस्त तैनात करण्यात आला होता. या शिवाय शहरी भागात बिटमार्शल मार्फत गस्त घातली जात होती. हिंगोली शहर पोलिस ठाण्याचे कर्मचारी देखील गस्तीवर होते. दरम्यान, मध्यरात्री दिड वाजण्याच्या सुमारास कमलानगर भागात विनोद गोरे व भुषण खिल्लारे यांच्या दोन गटात वाद सुरु असून हाणामारी होत असल्याची माहिती हिंगोली शहर पोलिसांना मिळाली होती. त्यावरून जमादार संजय डोंगरदिवे व त्यांचे सहकारी घटनास्थळी पोहोचले. पोलिस आल्याचे लक्षात आल्यानंतर काही जणांनी तेथून पळ काढला. मात्र त्या ठिकाणी दोघे जण गंभीर जखमी असल्याने जमादार डोंगरदिवे यांनी वाहन बोलावून त्यांना उपचारासाठी रुग्णालयात हलविले. दोन्ही गटातील वाद सोडवित असतांना १० ते १२ जणांच्या टोळक्याने डोंगरदिवे यांच्यावर हल्ला चढविला. अचानक झालेल्या हल्यामुळे त्यांना प्रतिकार करण्याची संधीही मिळाली नाही. यावेळी झालेल्या मारहाणीत ते गंभीर जखमी झाले. या घटनेची माहिती मिळाल्यानंतर पोलिस अधिक्षक निलभ रोहन, पोलिस निरीक्षक संदीप मोदे, जमादार अशोक धामणे, शेख मुजीब, शंकर ठोंबरे, गणेश लेकुळे, संतोष करे, संजय मार्के, महम्मद शेख, अजमद शेख यांच्या पथकाने घटनास्थळी धाव घेतली. त्यानंतर टोळके पळून गेले. या मारहाणीत जखमी झालेल्या जमादार डोंगरदिवे यांना रुग्णालयात उपचारासाठी दाखल करण्यात आले. त्यांच्या डोक्याला, हाताला गंभीर दुखापत झाली आहे. या प्रकरणात पोलिसांनी चौघांना चौकशीसाठी ताब्यात घेतले आहे. या प्रकरणी गुन्हा दाखल झाला नाही.
