बातमी ऐका (Marathi Voice Reader)
नागपुरात थंडीमुळे हेल्मेटमध्ये विषारी नाग लपून बसल्याची घटना पुढे आली आहे. त्यामुळे घराबाहेर पडण्यापूर्वी डोक्याचे हेल्मेट, पायातील चप्पल किंवा बूट, कपडे आदी कोणतीही वस्तू एकदा तपासून किंवा झटकून घ्या असे म्हणण्याची वेळ आली आहे. ही घटना गत बुधवारी घडली. पण तिचा एक व्हिडिओ आज सोशल मीडियात चांगलाच व्हायरल झाला आहे. यासंबंधीच्या माहितीनुसार, नागपूर शहरातील सेमिनरी हिल परिसरातील मिताली चतुर्वेदी यांच्या कुटुंबात ही घटना घडली. मिताली यांनी आपले दुचाकीवरील हेल्मेट घरात ठेवले होते. बुधवारी दुपारी 2.30 च्या सुमारास त्यांना हेल्मेटमधून सापाचा फुत्कार ऐकू आला. त्यांनी घाबरून जवळ जाऊन पाहिले असता त्यांना हेल्मेटमध्ये कोब्रा जातीचा साप लपल्याचे आढळून आले. त्यांनी ही गोष्ट तत्काळ वन्यजीव संरक्षक शुभम जी. आर. यांच्या कानावर घातली. त्यानंतर शुभम यांनी तत्काळ मिताली यांच्या घराकडे धाव घेत या कुटुंबाला हेल्मेटमध्ये लपलेल्या विषारी नागापासून वाचवले. स्थानिक संघटना वाइल्ड अॅनिमल्स अँड नेचर हेल्पिंग सोसायटीच्या तज्ज्ञांनी या सापाला पकडून सुरक्षितपणे जंगलात नेऊन त्याच्या नैसर्गिक अधिवासात सोडले. यासंबंधीचा एक व्हिडिओ सोशल मीडियात व्हायरल झाला आहे. त्यात साप हेल्मेटच्या कपड्याच्या आत लपल्याचे दिसून येत आहे. साप अनेकदा निवारा व अन्नाच्या शोधात मानवी वस्तीत येतात. त्यातून अशा घटना घडतात, असे शुभम यांनी सांगितले.
नेमकी कशी घडली घटना? मिताली आपले हेल्मेट नेहमी आपल्या दुचाकीला अडकवून ठेवतात. पण बुधवारी त्यांनी ते हेल्मेट दुचाकीला न अडवता आपल्या घरात नेले. तिथे ते एका बाजूला ठेवले. दुपारी 2.30 च्या सुमारास त्यांना काही कामानिमित्त घराबाहेर जायचे होते. त्या त्याची तयारी करत होत्या. त्यावेळी अचानक त्यांना हेल्मेटच्या आतून फुत्कार ऐकू आला. हा आवाज ऐकूण मिताली घाबरल्या. त्यांनी त्याची माहिती आपल्या कुटुंबीयांना दिली. कुटुंबीयांनी सावधपणे हेल्मेट उलटे करून पाहिले असता त्यात एक विषारी कोब्रा जातीचा नाग असल्याचे आढळून आले. हे पाहून सर्वांची भीतीने गाळण उडाली. हेल्मेट उलटे करताच नाग सळसळत हेल्मेटच्या काळ्या कपड्याबाहेर आला. त्याने माणसांना पाहून आपला फणा काढला. हे पाहून मिताली व त्यांचे कुटुंबीय भयभीत झाले. हेल्मेटमध्ये साप निघाल्याची बातमी काही वेळातच शहरात पसरली. अनेकांनी हा साप पाहण्यासाठी मिताली यांच्या घराकडे धाव घेतली. त्यानंतर ‘वाइल्ड एनिमल्स एंड नेचर हेल्पिंग सोसाइटी’ स्थानिक सदस्य शुभम यांना ही गोष्ट कळवण्यात आली. त्यांनी तातडीने घटनास्थळी धाव घेऊन या सापाची सुटका केली. या संपूर्ण घटनेचा एक व्हिडिओ सोशल मीडियावर व्हायरल झाला आहे. या गोष्टींकडे विशेष लक्ष देण्याची गरज नागांमध्ये न्यूरोटॉक्सिक विष असते. त्यांचा एकच डंख प्राणघातक ठरू शकतो. तज्ज्ञांच्या मते, हिवाळ्यात घराजवळ विटा व दगड साठवलेले असतील तर सापही राहू शकतात. ते लाकूड व पेंढ्याच्या ढिगाऱ्यातही शिरू शकतात. घराच्या अंगणात खूप झाडे असतील तर त्यांच्या पडलेल्या पानांच्या ढिगाऱ्यातही साप बसू शकतात. त्यामुळे सर्पमित्र हिवाळ्यात सापांचा प्रादुर्भाव टाळण्यासाठी भिंतीमधील भेगा भरण्याचा सल्ला देतात. तसेच भिंती व पाईपधील जागा भरण्याचीही सूचना देतात.
