सोलापूर महानगरपालिका निवडणुकीच्या रणधुमाळीत एका भीषण हत्याकांडाने संपूर्ण शहर सुन्न झाले आहे. मनसे विद्यार्थी सेनेचे पदाधिकारी बाळासाहेब सरवदे यांच्या हत्येप्रकरणी भाजपच्या उमेदवार शालन शिंदे यांना दोन दिवसांची पोलिस कोठडी सुनावण्यात आली आहे. महापालिका निवडणुकीच्या इतिहासात एखाद्या अधिकृत उमेदवाराला हत्येच्या गुन्ह्यात पोलिस कोठडी मिळण्याची ही पहिलीच वेळ असून, या घटनेमुळे राजकीय वर्तुळात मोठी खळबळ उडाली आहे. सोलापुरातील जोशी गल्ली येथे शुक्रवारी उमेदवारी अर्ज मागे घेण्याच्या कारणावरून भाजपच्या दोन गटांत जोरदार वाद झाला. भाजपच्या अधिकृत उमेदवार शालन शिंदे आणि बंडखोर उमेदवार रेखा सरवदे यांच्या कुटुंबात हा संघर्ष झाला. या वादाचे पर्यावसान हत्येत झाले असून, यात बाळासाहेब सरवदे यांचा मृत्यू झाला. या प्रकरणी अटकेत असलेल्या भाजप उमेदवार शालन शिंदे यांना 2 दिवसांची, तर आतिश शिंदे, अमर शिंदे आणि तानाजी शिंदे या तीन आरोपींना 4 दिवसांची पोलिस कोठडी प्रथम वर्ग न्यायदांडाधिकारी श्रीमती एम. पी. मर्ढेकर यांनी सुनावली आहे. डोळ्यात चटणी टाकून केले वार मयत बाळासाहेब यांचे बंधू बाजीराव सरवदे यांनी दिलेल्या फिर्यादीनुसार, ही घटना अत्यंत क्रूरपणे घडवण्यात आली. तक्रारीत नमूद केल्यानुसार, भाजप उमेदवार शालन शिंदे यांनी बाळासाहेब यांच्या डोळ्यात चटणी टाकली आणि त्यानंतर इतर आरोपींनी त्यांच्यावर धारदार शस्त्राने भीषण वार केले. विविध कलमान्वये गुन्हा दाखल याप्रकरणी सोलापूरच्या जेलरोड पोलिस ठाण्यात 15 जणांविरुद्ध हत्येचा गुन्हा दाखल करण्यात आला आहे. पोलिसांनी या प्रकरणी भारतीय न्याय संहिता (BNS) आणि इतर कायद्यांनुसार कठोर कलमे लावली आहेत. बीएनएस कलम 103, 109, 189 (1),(2), 190, 191(2),(3), 49, 352, 351(2), शस्त्र अधिनियम 4, 25 आणि महाराष्ट्र पोलिस अधिनियम 135 प्रमाणे गुन्हा नोंद करण्यात आला आहे. भाजप आमदारावर गंभीर आरोप या हत्याकांडाचे पडसाद राजकीय स्तरावर उमटले असून, मनसे आणि मार्क्सवादी कम्युनिस्ट पक्षाने आक्रमक पवित्रा घेतला आहे. मनसे नेते प्रशांत इंगळे आणि माकपचे माजी आमदार नरसय्या आडम यांनी या प्रकरणाचा सूत्रधार भाजप आमदार विजयकुमार देशमुख आणि त्यांचे चिरंजीव डॉ. किरण देशमुख असल्याचा खळबळजनक आरोप केला आहे. यामुळे सोलापुरातील भाजपपुढील अडचणीत मोठी वाढ झाली आहे. हे ही वाचा… ‘बिनविरोध’साठी मनसेच्या पदाधिकाऱ्याचा मर्डर:आता ही घटना कौटुंबिक वादातून घडल्याचा दावा होईल, खासदार प्रणिती शिंदे संतापल्या काँग्रेस खासदार प्रणिती शिंदे यांनी या प्रकरणी भाजपला आरोपीच्या पिंजऱ्यात उभे केले आहे. बिनविरोध निवडून येण्यासाठी मनसेच्या पदाधिकाऱ्याची हत्या करण्यात आली. पण आता ही हत्या कौटुंबिक वादातून झाल्याचा दावा केला जाईल, असे त्यांनी म्हटले आहे. सविस्तर वाचा…
