बातमी ऐका (Marathi Voice Reader)
पडेगाव परिसरातील कासंबरी दर्गा भागात सुरू असलेल्या महापालिकेच्या ड्रेनेजलाइनच्या कामाने मंगळवारी संध्याकाळी एका कुटुंबाचा आधार हिरावून घेतला. पोटासाठी घरापासून दूर आलेल्या १९ वर्षांच्या महेशभाई रूपसिंग डांगोर (रा. गुजरात) या तरुण मजुराचा अंगावर मातीचा ढिगारा कोसळून मृत्यू झाला. कासंबरी दर्गा भागात ड्रेनेजसाठी जेसीबीच्या साहाय्याने सुमारे ५ फूट खोल चारी खोदण्याचे काम सुरू होते. त्या चारीत महेश काम करत होता. चारीतून उपसलेली माती व दगडांचा ढिगारा लगतच होता. हा ढिगारा अचानक कोसळला आणि काही क्षणांत महेश मातीखाली गाडला गेला. या घटनेनंतर सहकाऱ्यांनी जिवाच्या आकांताने माती बाजूला करत महेशला बाहेर काढले. बेशुद्ध अवस्थेत त्याला घाटी रुग्णालयात दाखल करण्यात आले. मात्र, डॉक्टरांनी तपासणीनंतर त्याला मृत घोषित केले. या घटनेची नोंद छावणी पोलिस ठाण्यात केली आहे. चारीलगत टाकलेली माती अचानक ढासळली
मंगळवारी सकाळीच महेशने आपल्या आईशी फोनवर संवाद साधला होता. ‘आई, लवकरच घरी पैसे पाठवतो,’ असे तो आईला म्हणाला होता. त्याच्या घरी गुजरातमध्ये आई, वडील व एक भाऊ आहे. कुटुंबाला आर्थिक आधार देण्याचे स्वप्न घेऊन तो शहरात कामाला आला होता. चारी खोदून उपसलेली माती, दगड चारीलगत न टाकता काही अंतरावर टाकले असते तर दुर्घटना टळली असती.
