एकुलत्या एका मुलाच्या मृत्यूचे कारण अद्याप अस्पष्ट
सुरेश पाचभाई | मारेगाव
मारेगाव : तालुक्यातील पिसगाव येथे अवघ्या १७ वर्षीय महाविद्यालयीन विद्यार्थ्याने गळफास घेऊन आत्महत्या केल्याची घटना शुक्रवारी (९ जानेवारी) सायंकाळी सुमारे ६ वाजताच्या सुमारास उघडकीस आली. या घटनेमुळे संपूर्ण परिसरात हळहळ व्यक्त होत असून गावावर शोककळा पसरली आहे.
कुंदन बबन आत्राम (वय १७) असे आत्महत्या केलेल्या तरुणाचे नाव असून तो मारेगाव येथील एका महाविद्यालयात शिक्षण घेत होता. कुंदन हा आई-वडिलांचा एकुलता एक मुलगा होता. त्याचे आई-वडील रोजमजुरी करून कुटुंबाचा उदरनिर्वाह करीत होते.
शुक्रवारी सायंकाळी कुंदनचे आई-वडील शेतातून घरी परतल्यानंतर घरात घडलेला प्रकार त्यांच्या लक्षात आला. यानंतर एकच आक्रोश झाला. घटनेची माहिती मिळताच ग्रामस्थांनी घटनास्थळी धाव घेतली.
दरम्यान, आत्महत्येमागील नेमके कारण अद्याप स्पष्ट झाले नसून याबाबत पोलीस अधिक तपास करीत आहेत.
कुंदनच्या अकाली मृत्यूमुळे आई-वडिलांवर दु:खाचा डोंगर कोसळला असून त्यांची मानसिक अवस्था अत्यंत विदारक झाली आहे.या घटनेने पिसगावसह परिसरात शोकाकुल वातावरण निर्माण झाले आहे.
