सुरेश पाचभाई / मारेगाव
मारेगाव तालुक्यातील म्हैसदोडका येथे ब्रह्मलीन वंदनीय राष्ट्रसंत श्री तुकडोजी महाराज यांच्या ५७ व्या पुण्यस्मरणानिमित्त तसेच सर्व संत स्मृतीदिनानिमित्त दोन दिवसीय धार्मिक व सामाजिक कार्यक्रमांचे आयोजन करण्यात आले होते.
हा सोहळा शनिवार, दि. १७ जानेवारी २०२६ व रविवार, दि. १८ जानेवारी २०२६ रोजी हनुमान देवस्थान, म्हैसदोडका (ता. मारेगाव, जि. यवतमाळ) येथे उत्साहात संपन्न झाला.या कार्यक्रमाचे आयोजन श्री गुरुदेव सेवा भजन मंडळ, श्री जगन्नाथ बाबा महिला भजन मंडळ, श्री पदावली भजन मंडळ तसेच समस्त ग्रामवासी म्हैसदोडका यांच्या संयुक्त विद्यमाने करण्यात आले होते.
शनिवार, दि. १७ जानेवारी रोजी पहाटे ग्रामसफाई, घटस्थापना, सामुदायिक ध्यान व ग्रामगीता वाचनाने कार्यक्रमाची सुरुवात झाली. दिवसभर विविध भजन मंडळांचे भजन, कीर्तन व सामुदायिक प्रार्थना आयोजित करण्यात आली होती.
यामध्ये परिसरातील तसेच बाहेरील नामवंत भजन मंडळांनी सहभाग घेतला. सायंकाळी कु.भाविका सुखदेव खंडाळकर (नागपूर) यांचे प्रभावी कीर्तन झाले.रविवार, दि. १८ जानेवारी रोजी सकाळी सामुदायिक ध्यान व ग्रामगीता वाचनानंतर पालखी सोहळा व दिंडी भजन पार पडले. दुपारी कार्यकर्ता मेळाव्याचे आयोजन करण्यात आले होते. यावेळी जिल्हा, तालुका व गुरुकुंज मोजरी येथील मान्यवर प्रचारक व पदाधिकाऱ्यांनी उपस्थितांना मार्गदर्शन केले.
सायंकाळी काला व त्यानंतर महाप्रसादाने कार्यक्रमाची सांगता झाली.या सोहळ्याच्या माध्यमातून ग्रामगीतेतील विचार, सामाजिक एकोपा, श्रमसंस्कार व ग्रामोन्नतीचा संदेश जनमानसात पोहोचवण्याचा प्रयत्न करण्यात आला. या कार्यक्रमाला परिसरातील भाविक भक्तांनी मोठ्या संख्येने उपस्थित राहून लाभ घेतला.
