बातमी ऐका (Marathi Voice Reader)
मुंबईत शिंदे गटाचे पुरंदरचे आमदार विजय शिवतारे यांच्यावर सोमवारी किडनी प्रत्यारोपणाची शस्त्रक्रिया यशस्वीरीत्या पार पडली. गंभीर मूत्रपिंडाच्या आजाराने त्रस्त असलेल्या शिवतारे यांची दोन्ही किडनी निकामी झाल्याने त्यांना नियमित डायलिसिस घ्यावे लागत होते. अशा परिस्थितीत त्यांची कन्या डॉ. ममता शिवतारे यांनी पुढाकार घेत स्वतःची किडनी वडिलांना दान करण्याचा मोठा निर्णय घेतला. या निर्णयामुळे वडिलांना नवजीवन मिळाल्याची भावना व्यक्त होत असून या घटनेची सर्वत्र चर्चा सुरू आहे. गेल्या काही वर्षांपासून सुरू असलेल्या उपचारांनंतर अखेर सोमवारी ही शस्त्रक्रिया पार पडली. डॉक्टरांच्या माहितीनुसार, शस्त्रक्रियेनंतर विजय शिवतारे आणि ममता शिवतारे या दोघांचीही प्रकृती स्थिर आहे. या घटनेमुळे कुटुंबीयांसह समर्थकांमध्ये दिलासा निर्माण झाला आहे. वडिलांसाठी मुलीने केलेल्या या त्यागामुळे समाजातूनही मोठ्या प्रमाणावर कौतुक होत आहे. दरम्यान, ममता शिवतारे या आयपीएस अधिकारी शिवदीप लांडे यांच्या पत्नी असून, त्यांनी सोशल मीडियावर आपल्या पत्नीबद्दल अत्यंत भावनिक शब्दांत प्रतिक्रिया व्यक्त केली आहे. त्यांनी लिहिलेल्या पोस्टमध्ये आपल्या आयुष्यातील अनेक संकटांचा उल्लेख करत, मी अनेक कठीण प्रसंगांना सामोरा गेलो, पण तुझ्या एका निर्णयाने मला आतून हलवून टाकलं, असे त्यांनी म्हटले आहे. वडिलांना नवजीवन देण्यासाठी घेतलेला हा निर्णय त्यांच्या दृष्टीने अभिमानास्पद असल्याचे त्यांनी नमूद केले. शिवदीप लांडे यांनी पुढे लिहिले की, गेल्या तीन महिन्यांपासून शस्त्रक्रियेसाठी लागणाऱ्या तपासण्या, कागदपत्रांची प्रक्रिया आणि कायदेशीर अडचणी ममता यांनी एकट्याने सांभाळल्या. त्या सर्व प्रक्रियेत ते फक्त एक साक्षीदार म्हणून उभे होते. देव मुलगी का देतो, याचे उत्तर मला आज मिळाले, असे म्हणत त्यांनी मुलीच्या निःस्वार्थ प्रेमाचे कौतुक केले. मुलगी ही देवाची सर्वात मोठी देणगी आयसीयूमध्ये पत्नीच्या शेजारी बसून तिच्याकडे पाहताना भावनांना आवर घालता येत नसल्याचे त्यांनी सांगितले. नात्यांमध्ये अनेकजण साथ सोडू शकतात, पण मुलगी मात्र ठाम उभी राहते, असे ते म्हणाले. ममता शिवतारेंच्या या निर्णयामुळे, मुलगी ही देवाची सर्वात मोठी देणगी आहे, हे पुन्हा अधोरेखित झाले असल्याची भावना त्यांनी व्यक्त केली.
