ग्रामीण मुलींमध्ये आत्मविश्वास निर्माण करण्याचा उपक्रम
पांढरकवडा | प्रतिनिधी : सागर मुडे
ग्रामीण भागातील मुलींमध्ये खेळाविषयी आत्मविश्वास, नेतृत्वगुण आणि संघभावना विकसित करण्याच्या उद्देशाने केळापूर तालुका प्रेस क्लबने घुबडी येथील मुलींची क्रिकेट टीम दत्तक घेतली आहे. जनहित संस्था, पांढरकवडा यांच्या वतीने राबविण्यात येणाऱ्या “निर्मिती – The Gang of Girls” या उपक्रमांतर्गत ग्रामीण मुलींसाठी विशेष क्रिकेट स्पर्धेचे आयोजन करण्यात आले होते.
दि. १८ जानेवारी २०२६ रोजी कोब्बई (कोपा मांडवी) येथे ही भव्य क्रिकेट स्पर्धा पार पडली. या स्पर्धेत टिपेश्वर परिसरातील विविध गावांमधील मुलींनी उत्स्फूर्त सहभाग नोंदविला. याच स्पर्धेमध्ये घुबडी येथील मुलींच्या क्रिकेट टीमला केळापूर तालुका प्रेस क्लबने प्रायोजित केले.
ग्रामीण भागातील मुलींना खेळासाठी मर्यादित संधी उपलब्ध असतात. अशा परिस्थितीत खेळाच्या माध्यमातून त्यांना स्वतःची ओळख निर्माण करता यावी, यासाठी केळापूर तालुका प्रेस क्लबतर्फे घुबडी येथील महिला क्रिकेट टीम दत्तक घेण्याचा निर्णय घेण्यात आला.
यावेळी केळापूर तालुका प्रेस क्लबचे अध्यक्ष विशाल मग्गीडवार यांनी सांगितले की, भविष्यातही सामाजिक व लोकहिताच्या उपक्रमांसाठी प्रेस क्लब सदैव तत्पर राहील. तसेच या उपक्रमाचे आयोजन करणारे जनहित संस्थेचे सुबोध काळपांडे व त्यांच्या संपूर्ण टीमचे त्यांनी आभार मानले.
प्रेस क्लबचे माजी अध्यक्ष गणेश अनमुलवार यांनी सांगितले की, “मुलींसाठी क्रिकेट हा केवळ खेळ नसून तो त्यांच्या ओळखीचा, सन्मानाचा आणि उज्ज्वल भविष्याचा मार्ग आहे. अशा उपक्रमांमुळे ग्रामीण मुलींना स्वतःला सिद्ध करण्यासाठी नवे व्यासपीठ मिळते.”
या प्रसंगी ज्येष्ठ पत्रकार आशिष बडवे, सुबोध काळपांडे, नितीन बाराहाते, अतिक शेख, निखिल बेले, सागर मुडे, युनूस शेख, सुरज बंडीवार, बाळा सस्ते, सुरज चौधरी आदी मान्यवर उपस्थित होते.