बातमी ऐका (Marathi Voice Reader)
शिवसेना (उद्धव बाळासाहेब ठाकरे) पक्षातील सहा खासदारांच्या बंडामुळे राज्यातील राजकारण ढवळून निघाले असताना, ठाकरे गटासोबत राहिलेले नाशिकचे खासदार राजाभाऊ वाजे नाशिकमध्ये दाखल झाले. नाशिक रोड रेल्वे स्थानकावर शिवसैनिकांनी त्यांचे ढोल-ताशांच्या गजरात, घोषणाबाजी करत आणि फुलांचा वर्षाव करून जंगी स्वागत केले. दिल्लीत सुरू असलेल्या ‘ऑपरेशन टायगर’च्या पार्श्वभूमीवर ठाकरे गटातील नऊपैकी सहा खासदारांनी वेगळी भूमिका घेतल्याची चर्चा सुरू असताना, राजाभाऊ वाजे यांनी मात्र उद्धव ठाकरे यांच्यासोबत राहण्याचा निर्णय घेतल्याने ते सध्या चर्चेच्या केंद्रस्थानी आले आहेत. ‘मी ज्या विचारधारेतून निवडून आलो, त्याच्याशी प्रामाणिक आहे’ नाशिकमध्ये माध्यमांशी संवाद साधताना राजाभाऊ वाजे यांनी आपल्या भूमिकेचा पुनरुच्चार केला. “ज्या विचारधारेतून मी निवडून आलो, त्या विचारधारेशी मी प्रामाणिक आहे. मी घेतलेला निर्णय योग्य आहे, याचीच ही पावती आहे. मी प्रामाणिकपणे माझं काम करत आहे.” वाजे यांच्या स्वागतासाठी मोठ्या संख्येने जमलेल्या शिवसैनिकांचा उल्लेख करत त्यांनी कार्यकर्त्यांचे प्रेम आणखी वाढल्याची भावना व्यक्त केली. ‘मला ऑफर मिळाली नाही; मला पाहिजे ते आधीच मिळालं आहे’ गेल्या काही दिवसांपासून बंडखोर खासदारांना कोट्यवधी रुपयांच्या ऑफर्स देण्यात आल्याच्या चर्चांवरही वाजे यांनी अप्रत्यक्ष भाष्य केले. “मला ऑफर मिळाली नव्हती. मला पाहिजे ते मला मिळत आहे आणि ते माझ्यासाठी खूप आहे.” असे सांगत त्यांनी कोणत्याही प्रलोभनांना बळी न पडल्याचा संदेश दिला. ‘वाजे कुटुंबाने निष्ठा राखली’ दरम्यान, ठाकरे गटाचे नेते संजय राऊत यांनी दावा केला होता की काही खासदारांना मोठ्या आर्थिक ऑफर्स तसेच विकासकामांची आश्वासने देण्यात आली होती. त्याच पार्श्वभूमीवर राजाभाऊ वाजे यांच्याशी संपर्क साधण्याचे प्रयत्न झाल्याची चर्चा राजकीय वर्तुळात रंगली होती. मात्र, वाजे कुटुंबाने कोणत्याही दबावाला किंवा राजकीय प्रस्तावांना बळी न पडता आपली भूमिका कायम ठेवल्याचे ठाकरे गटाकडून सांगितले जात आहे. दिल्लीतील पत्रकार परिषदेत झाले होते भावुक सहा खासदारांच्या बंडानंतर दिल्लीत झालेल्या पत्रकार परिषदेत संजय राऊत यांनी शिवसेना, बाळासाहेब ठाकरे आणि शिवसैनिकांचे नाते याविषयी भावनिक भाषण केले होते. त्यावेळी राजाभाऊ वाजे यांच्याही भावना अनावर झाल्याचे दिसून आले होते. पक्षावर आलेले संकट, सहकाऱ्यांची फूट आणि कार्यकर्त्यांची भावना यांचा उल्लेख होत असताना वाजे यांना अश्रू अनावर झाल्याचे दृश्य चर्चेत आले होते. ठाकरे गटासाठी ‘निष्ठेचे प्रतीक’ बनले वाजे? सध्या शिवसेना (उबाठा)मध्ये सुरू असलेल्या मोठ्या राजकीय संकटात राजाभाऊ वाजे, अरविंद सावंत आणि अनिल देसाई हे ठाकरे गटासोबत ठामपणे उभे राहिल्याचे चित्र आहे. त्यामुळे नाशिकमध्ये झालेल्या त्यांच्या स्वागताकडे केवळ एका खासदाराच्या आगमनापेक्षा अधिक, तर ठाकरे गटाच्या निष्ठावंत कार्यकर्त्यांच्या शक्तिप्रदर्शनाच्या दृष्टीने पाहिले जात आहे. दरम्यान, सहा बंडखोर खासदारांची पुढील भूमिका, लोकसभा अध्यक्षांकडे दिलेल्या पत्रावरील निर्णय आणि त्यानंतर होणाऱ्या राजकीय घडामोडी याकडे संपूर्ण महाराष्ट्राचे लक्ष लागले असताना, नाशिकमध्ये राजाभाऊ वाजेंना मिळालेला प्रतिसाद ठाकरे गटासाठी काहीसा दिलासादायक मानला जात आहे.
