सुरेश पाचभाई, मारेगाव
मारेगाव तालुक्यातील मुक्टा येथे मानवतेचे महान पुजारी, विश्वशांतीचे पुरस्कर्ते व राष्ट्रधर्माचे संस्थापक ब्रह्मलीन वंदनीय राष्ट्रसंत श्री तुकडोजी महाराज यांचा ५७ वा पुण्यस्मरण सोहळा दि. १९ ते २१ जानेवारी २०२६ या कालावधीत विविध धार्मिक व सामाजिक उपक्रमांनी उत्साहात साजरा होत आहे.
श्री गुरुदेव सेवा मंडळ, मुक्टा व श्री गुरुदेव सेवा महिला मंडळ, मुक्टा यांच्या संयुक्त विद्यमाने हा त्रिदिवसीय सोहळा हनुमान मंदिर, राष्ट्रसंत तुकडोजी महाराज मंदिर व जगन्नाथ महाराज मंदिर परिसरात आयोजित करण्यात आला आहे. राष्ट्रीय एकात्मता, सामाजिक समता व ग्रामोन्नती या उद्देशाने भजन, कीर्तन, ध्यान, सामुदायिक प्रार्थना, ग्रामसफाई यांसारखे विधायक उपक्रम राबविण्यात येत आहेत.
सोमवार (दि. १९) रोजी ग्रामसफाई मोहिमेने सोहळ्याची सुरुवात झाली. सायंकाळी राष्ट्रसंत तुकडोजी महाराज यांच्या पुतळ्याचे अभ्यंगस्नान व पूजन, घटस्थापना तसेच सामुदायिक प्रार्थना संपन्न झाली. रात्री महिला भजन मंडळाचा भक्तिरसपूर्ण भजन कार्यक्रम झाला.
मंगळवार (दि. २०) रोजी पहाटे ध्यान व ग्रामगीता वाचन करण्यात आले. दिवसभर भजन कार्यक्रम सुरू होते. सायंकाळी सामुदायिक प्रार्थना तर रात्री राष्ट्रीय कीर्तनकार ह.भ.प. श्री गंगाधरजी लोणसावळे महाराज यांचे जाहीर कीर्तन मोठ्या भक्तिभावात पार पडले.
आज बुधवार (दि. २१) रोजी सकाळी ग्रामसफाई, ध्यान व ग्रामगीता वाचनानंतर रामधून, पालखी सोहळा व दिंडीचे आयोजन करण्यात आले. या दिंडीत परिसरातील विविध भजन मंडळांनी सहभाग घेतला. दुपारी काल्याचे कीर्तन, मौन श्रद्धांजली, राष्ट्रवंदना, मान्यवरांचा सत्कार व महाप्रसादाने सोहळ्याची सांगता होणार आहे.
या पुण्यस्मरण सोहळ्यास परिसरातील भाविक व ग्रामवासीयांनी मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे.
