निंबाळा फाट्याजवळ भीषण अपघात; हेल्मेटमुळे बचाव
सुरेश पाचभाई मारेगाव
मारेगाव – वणी मार्गावर बेदरकार टिप्परचालकांच्या वाढत्या दहशतीचे आणखी एक धक्कादायक उदाहरण शनिवारी (दि. २६ मार्च) दुपारी समोर आले. मारेगाव येथील पत्रकार ज्योतिबा पोटे हे दुचाकीने प्रवास करत असताना, निंबाळा फाट्याजवळील टाटा मोटर्स शोरूमसमोर एका भरधाव टिप्परने धोकादायक पद्धतीने ओव्हरटेक केल्याने भीषण अपघात घडला. या अपघातात ज्योतिबाजी पोटे गंभीर जखमी झाले आहेत.
मिळालेल्या माहितीनुसार, दुपारी सुमारे १ वाजण्याच्या सुमारास ज्योतिबा पोटे हे वणी येथून बँकेचे काम आटोपून मारेगावकडे परतत होते. याचवेळी मागून आलेल्या टिप्परने अतिवेगाने आणि नियमबाह्य पद्धतीने ओव्हरटेक करण्याचा प्रयत्न केला. टिप्पर अंगावर येत असल्याचे लक्षात येताच पोटे यांनी दुचाकी बाजूला घेण्याचा प्रयत्न केला; मात्र वेगावर नियंत्रण सुटल्याने ते दुचाकीसह रस्त्यावर आपटले आणि काही अंतर फरफटत गेले.
या अपघातात त्यांच्या चेहऱ्याला, नाकाला तसेच शरीराच्या विविध भागांना गंभीर दुखापत झाली असून ते रक्तबंबाळ अवस्थेत रस्त्यावर पडले होते. स्थानिक नागरिकांनी तत्काळ मदत करून त्यांना उपचारासाठी रुग्णालयात हलवले.
प्रत्यक्षदर्शींनी दिलेल्या माहितीनुसार, पोटे यांनी हेल्मेट परिधान केले असल्याने मोठा अनर्थ टळला. डोक्याला गंभीर इजा होण्यापासून त्यांचा बचाव झाला असून, हेल्मेटमुळेच त्यांना ‘पुनर्जन्म’ मिळाल्याची चर्चा परिसरात आहे.
दरम्यान, वणी–मारेगाव मार्गावर टिप्पर चालकांकडून वाहतुकीच्या नियमांचे सर्रास उल्लंघन होत असल्याची तक्रार नागरिकांकडून वारंवार करण्यात येत आहे. बेदरकार ओव्हरटेक, अतिवेग आणि निष्काळजीपणामुळे अपघातांचे प्रमाण वाढत असल्याने नागरिकांमध्ये संताप व्यक्त होत आहे.
या प्रकरणी संबंधित टिप्पर चालकाविरोधात कडक कारवाई करण्यात यावी तसेच या मार्गावर वाहतूक नियंत्रणासाठी प्रशासनाने ठोस उपाययोजना कराव्यात, अशी मागणी स्थानिक नागरिक व पत्रकारांकडून करण्यात येत आहे.
