झरी–घोन्सा मार्गावरील दुर्गापूरजवळील वळणावर दुर्घटना
ज्ञानेश्वर आवारी झरी जामणी
झरी–घोन्सा मार्गावरील दुर्गापूर गावाजवळील वळणावर झालेल्या दुचाकी अपघातात वणी येथील माजी नगरसेवक राजेश वामनराव डफ रा. रंगारी पुरा वणी (वय अंदाजे ५५) यांचा जागीच मृत्यू झाल्याची दुर्दैवी घटना आज दुपारी सुमारे तीन वाजताच्या सुमारास घडली. या घटनेमुळे वणी व झरी परिसरात हळहळ व्यक्त करण्यात येत आहे.
मिळालेल्या प्राथमिक माहितीनुसार, राजेश डफ हे झरी येथे आज सकाळी एका बैठकीसाठी आले होते. बैठक आटोपल्यानंतर ते आपल्या दुचाकी (क्रमांक MH-29 AS 1856) ने वणीच्या दिशेने निघाले होते. दरम्यान, झरी–घोन्सा मार्गावरील दुर्गापूर गावाजवळील वळणावर त्यांच्या दुचाकीचे संतुलन अचानक बिघडले.त्यामुळे दुचाकी रस्त्यालगतच्या खड्यात जाऊन कोसळली. या अपघातात त्यांच्या डोक्याला व शरीराला गंभीर दुखापत होऊन त्यांचा जागीच मृत्यू झाला.
अपघाताच्या वेळी घटनास्थळी कोणीही उपस्थित नसल्याने अपघात नेमका कशामुळे झाला, याबाबत अद्याप स्पष्टता नसून कारण गूढ आहे. काही वेळानंतर शेजारील शेतात कापूस वेचत असलेल्या महिलांच्या ही घटना निदर्शनास आली. त्यांनी तत्काळ परिसरातील नागरिकांना माहिती दिली. नागरिकांनी पोलिसांना कळवताच घटनास्थळी गर्दी झाली.
घटनेची माहिती मिळताच पोलीस घटनास्थळी दाखल झाले. त्यांनी पंचनामा करून पुढील तपास सुरू केला आहे. अपघाताच्या काही वेळ आधी राजेश डफ यांनी एका कार्यक्रमातील छायाचित्रे सोशल मीडियावरील स्टेटसवर टाकली होती.
काही वेळातच त्यांच्या अपघाती निधनाची बातमी समजताच मित्रमंडळी व परिचितांनी घटनास्थळी धाव घेतली.या घटनेमुळे राजकीय व सामाजिक क्षेत्रात शोककळा पसरली असून सर्व स्तरांतून हळहळ व्यक्त करण्यात येत आहे.
