सुरेश पाचभाई मारेगाव
मारेगाव: महाराष्ट्र शासनाच्या वतीने शेतकरी, युवक तसेच सर्वसामान्य नागरिकांसाठी उपयुक्त ठरणाऱ्या *‘महा विस्तार AI अॅप’*ची नोंदणी मोहीम सध्या राज्यभर राबविण्यात येत असून, मारेगाव तालुक्यातील कृषी विभागाने नागरिकांना या अॅपवर जास्तीत जास्त नोंदणी करण्याचे आवाहन केले आहे.
आधुनिक डिजिटल तंत्रज्ञानाच्या माध्यमातून कृषी, रोजगार, प्रशिक्षण तसेच विविध शासकीय योजनांची माहिती एकाच अॅपद्वारे उपलब्ध करून देण्याच्या उद्देशाने हे अॅप विकसित करण्यात आले आहे. ‘न्यूज लावा दादा’ या उपक्रमांतर्गत महा विस्तार AI अॅपची माहिती जनतेपर्यंत पोहोचवून नोंदणी वाढविण्याचा प्रयत्न सुरू आहे.
या अॅपच्या माध्यमातून शेतकऱ्यांना पिक व्यवस्थापन, हवामानाचा अंदाज, बाजारभाव, कृषी सल्ला तसेच शासनाच्या विविध योजनांची अद्ययावत माहिती सहजपणे मिळणार आहे. त्यामुळे विशेषतः शेतकरी बांधवांनी या अॅपचा लाभ घ्यावा, असे आवाहन कृषी विभागाच्या वतीने करण्यात आले आहे.
उपक्रम यशस्वी करण्यासाठी स्वयंसेवक, सामाजिक कार्यकर्ते व युवकांनी पुढाकार घ्यावा, असेही आयोजकांनी सांगितले. डिजिटल तंत्रज्ञानाचा प्रभावी वापर करून ग्रामीण भागाचा सर्वांगीण विकास साधण्यासाठी महा विस्तार AI अॅप महत्त्वपूर्ण ठरणार असल्याचे मत यावेळी व्यक्त करण्यात आले.
नागरिकांनी आपल्या मोबाईलमध्ये महा विस्तार AI अॅप डाउनलोड करून नोंदणी करावी तसेच इतरांनाही यासाठी प्रोत्साहित करावे, असे आवाहन करण्यात आले आहे.