बातमी ऐका (Marathi Voice Reader)
पुण्यातील काँग्रेस भवन येथे रविवारी भाजप आणि काँग्रेस कार्यकर्त्यांमध्ये झालेल्या आंदोलनादरम्यान झालेल्या झटापट आणि दगडफेकीप्रकरणी दोन्ही पक्षांच्या कार्यकर्त्यांविरुद्ध गुन्हे दाखल करण्यात आले आहेत. शिवाजीनगर पोलिस ठाण्यात परस्परविरोधी तक्रारी दाखल झाल्यानंतर भाजपचे शहराध्यक्ष धीरज घाटे आणि काँग्रेसचे पदाधिकारी अरविंद शिंदे यांच्यासह अनेक कार्यकर्त्यांवर गुन्हा नोंदवण्यात आला आहे. काँग्रेसचे प्रदेशाध्यक्ष हर्षवर्धन सपकाळ यांनी छत्रपती शिवाजी महाराजांविषयी केलेल्या कथित अवमानकारक वक्तव्याच्या निषेधार्थ भाजपने हे आंदोलन केले होते. आंदोलनादरम्यान भाजप आणि काँग्रेस कार्यकर्ते आमनेसामने आले. त्यांच्यात झटापट होऊन दगडफेक झाली. या घटनेत काँग्रेसचे तीन, भाजपचे दोन, असे एकूण पाच कार्यकर्ते किरकोळ जखमी झाले. तसेच, दोन पोलिस कर्मचारी आणि दोन पत्रकारही किरकोळ जखमी झाले. या घटनेनंतर रात्री उशिरा काँग्रेसच्या कार्यकर्त्या प्राची नितीन दुधाणे (वय 42, रा. दुधाणेनगर, कर्वेनगर) यांनी शिवाजीनगर पोलिस ठाण्यात तक्रार दाखल केली. त्यांच्या फिर्यादीनुसार, भाजपचे शहराध्यक्ष धीरज घाटे, युवा मोर्चाचे पदाधिकारी दुष्यंत मोहोळ यांच्यासह 50 ते 60 कार्यकर्त्यांविरुद्ध गुन्हा नोंदवण्यात आला आहे. गुन्हे शाखेचे पोलिस निरीक्षक अमर काळंगे या प्रकरणाचा तपास करत आहेत. दरम्यान, भाजपचे पदाधिकारी पुनीत श्रीकांत जोशी (वय 35, रा. आयडियल कॉलनी, कोथरूड) यांनीही काँग्रेस कार्यकर्त्यांविरुद्ध परस्परविरोधी तक्रार दिली आहे. त्यांच्या फिर्यादीनुसार, काँग्रेसचे पदाधिकारी अरविंद शिंदे, गौरव बाळंदे, अक्षय जैन, सागर धाडवे यांच्यासह इतर कार्यकर्त्यांवर गुन्हा दाखल करण्यात आला आहे. सहायक पोलिस निरीक्षक संजय पांढरे या प्रकरणाचा पुढील तपास करत आहेत.
