बातमी ऐका (Marathi Voice Reader)
सत्ताधारी शिवसेनेच्या बीड उपतालुकाप्रमुखाने झाडाला गळफास लावून आत्महत्येचा प्रयत्न केल्याची खळबळजनक बाब समोर आली आहे. पण दैव बलवत्तर म्हणून ते ज्या साडीने गळफास घेत होते, ती फाटली आणि ते थोडक्यात बचावले. सध्या त्यांच्यावर स्थानिक रुग्णालयात उपचार सुरू आहेत. यासंबंधीच्या माहितीनुसार, शिवसेनेच्या शिंदे गटाचे बीड उपतालुकाप्रमुख भारत देवकते यांनी बीड लगतच्या म्हसोबा फाटा परिसरात बाभळीच्या झाडाला साडीने गळफास घेत आत्महत्या करण्याचा प्रयत्न केला. त्यांनी आपल्या व्हॉट्सएप स्टेटसवर गळ्यात साडी बांधलेला एक फोटो ठेवला होता. सोबत एक चिठ्ठीही ठेवली होती. त्यात त्यांनी आपल्या मृत्यूला ढेकणमोहा गावचे सरपंच पती व ग्रामसेवक जबाबदार असल्याचा आरोप केला आहे. भारत देवकते यांनी साडीच्या मदतीने गळफास घेण्याचा प्रयत्न केला. पण त्यांच्या वजनाने साडी फाटली. त्यामुळे ते थोडक्यात बचावले. भारत देवकते यांनी आत्महत्येचा प्रयत्न केल्याची बातमी वाऱ्यासारखी पंचक्रोशीत पसरली. त्यानंतर सर्वांनी म्हसोबा फाट्याकडे धाव घेतली. त्यानंतर त्यांना लगेचच लगतच्या रुग्णालयात दाखल करण्यात आले. तिथे त्यांच्यावर अतिदक्षता विभागात उपचार सुरू आहे. डॉक्टरांनी त्यांची प्रकृती धोक्याबाहेर असल्याचे सांगितले आहे. चिठ्ठीत काय केला होता आरोप? भारत देवकते यांनी आपल्या चिठ्ठीत आपल्या मृत्यूसाठी ढेकणमोहा गावचे सरपंची शिवाजी भगवान गाडीवान व ग्रामसेवक बी जी तांदळे हे दोघे जबाबदार असल्याचा आरोप केला होता. ते आपल्या चिठ्ठीत म्हणतात, मी गावातील गायगोठा, विहीर, शेततळे यासारखी कामे निःशुल्क दरात करण्याचे ठरवले होते. पण सरपंच पती व ग्रामसेवक यांना ते मान्य नव्हते. त्यांच्या मनमानी कारभारामुळे व सततच्या मानसिक त्रासामुळे मी माझे जीवन संपवत आहे. या दोघांना माझ्या मृत्यूसाठी जबाबदार धरून त्यांच्यावर कारवाई करण्यात यावी. देवकते यांनी आपल्या मित्रांना आणि शिवसैनिकांना उद्देशून लिहिलेल्या पत्रात स्पष्ट केले आहे की, या निर्णयासाठी त्यांची पत्नी, मुलगा किंवा कुटुंबातील कोणालाही दोषी धरू नये. तसेच त्यांनी जिल्हाप्रमुख अनिल जगताप यांनाही शेवटचा ‘जय महाराष्ट्र’ केला आहे. या घटनेमुळे जिल्ह्यात राजकीय आणि प्रशासकीय वर्तुळात मोठी खळबळ उडाली आहे.
